Умгьанат Сулейманова
Ухьуз мялум вуйиганси, 2024-пи йис «Хизандин йис» вуди тяйин дапIна. Му лишниккди учура йисандин арайиъ ужудар, баркаллу зегьмет зигурайи табасаран хизанарихъди ва дурарин хъуркьуваларихъди газат урхурайидар таниш апIидича.
Фунуб гъулан, шагьрин вушра, жямяаьт балгурайидар ужуб хизандиъ тербия гъадабгъу, аькьюллу, ватан ва халкь бадали зегьмет зигурайи касар ву. Йиз гъийин макьалайин игит гьациб хизандиан ву.
Улихьнаси, Санкт-Петербургдин шагьрин Святитель Лукайин больницайин урологияйин отделениейиъ хирургди лихурайи ихь ватанагьли Мурад Мирзабеговди гурдмариъ чIуру аьбгъювал айи яшлу аьзарлуйир хирургияйин кюмекниинди сагъ апIбан месэлайиз бахш дапIнайи докторвалин диссертация хъуркьувалиинди гъюбхну.
Мурад Мирзабегович Мирзабегов Хив райондин Хив гъулаъ духтрин хизандиъ бабкан гъахьну. Дугъан абйир-бабар Асккан Яркан ву. Адаш, машгьур духтир Мирзабег Мирзабегов хайлин йисари Дербентдин ЦГБ-йиъ урологияйин отделенияйин заведишди лихури гъахьну. Дугъан духтирвалин пишера уролог-хирург вуйи. Хъасин дугъу Дагъ. Огни шагьриъ 8-пи нумрайин МСЭ-йин документар уьрхру идарайин начальникди лихуру. Пенсияйиз удучIву Мирзабеговдиз, ляхнин тажруба айи ужур духтир ву кIури, Дербент шагьриъ МСЭ-йин идарайиз духтирди лихуз теклиф апIуру.
Мирзабег Мирзабегов албагу хизандин эйси, юкьур веледдин аба ва аькьюллу худларин аьхю абара ву. Чан уьмрин юлдаш Аният Мурсаловнайихъди сатIиди яшамиш шули, дугъан 48 йис ву. Му кьюрид касари чпин веледариз туву тербияйин натижа дурарин хъуркьувалари улупура. Аният Мирзабеговайи чан шубур риш ва бай жямяаьтдин арайиз тербиялу, халис адмийирси адаъну. Зимфира, аьхюну риш, Мячгьячгъалайиъ яшамиш шула. Дугъу Мягьячгъалайиъ Дагъустандин гьюкуматдин университетдин экономический факультет ккудубкIну. Кьялану риш Сабинайи педуниверситетдиъ гъурхну, ва гьамус думу Дербент шагьриъ «Даттуч» бицIидарин багъдин заведишди лихура. БицIуну риш Валида, пединститут ккудубкIну, хусуси предприниматель гъахьну.
Мирзабеговарин хизандин кьюрсан вакил, Сабина Мирзабеговнайин шубар, духтрар хьуз гьязур шула. Савзиханова Аида Мягьячгъалайиъ Дагъустандин медицинайин унивеситетдин сагъламвалин факультет ккудубкIну, Москвайиъ ординатурайиъ урхура, хъа Савзиханова Асият Санкт-Петербургдиъ И.П. Павловдин ччвурнахъ хъайи гьюкуматдин медицинайин университетдиъ сагъламвалин факультетдин 2 курснаъ урхура.
Мирзабег ва Аният Мирзабеговарин бай Мурадра, хизандин баркаллу аьдатариз вафалу вуди, уьмриъ гъудуркьу кас гъахьну.
Мурад, Хив райондиъ Хиварин кьялан мектеб ккудубкIну, 2006-пи йисан Мягьячгъалайиъ медицинайин университетдик урхуз кучIвнийи. 2012-пи йисан вуз ккудубкIну, думу, чан аьгъюваларин дережа ва ляхнин тажруба за апIуз кIури, Санкт-Петербургдиъ И.И. Мечниковдин ччвурнахъ хъайи Гьюкуматдин медицинайин университетдиъ ординатурайик кучIвру. 2014- пи йисхъанмина думу Санкт-Петербургдиъ Святитель Лукайин больницайиъ урологияйин отделенияйиъ хиругди лихура. Му больница Урусатдиъ варитIан ужударикан вуди гьисаб апIура. Жвуван ляхнихьна аьхю гьевес айи Мурадди, мюгьлет ккабхъубси, ординатурайиъ чан ляхнин тажруба ва аьгъюваларин дережа за апIури гъахьну. Хасиятнан дурумлувализ ва дивнайи метлеб кIулиз адабгъбан бадали зигьимдин, бедендин дакьатар сарф апIбаз лигну, Мурадди гъи медицинайин цирклиъ ужудар хъуркьувалар гъазанмиш дапIна. Дугъу, читин операцйир кIули гъахури, урологияйин жюбежюр уьзрар сагъ апIура.
Гъит ухьуз мицисдар дирбаш духтрар артухъ ишри. Хъа Мураддиз чан ляхниъ хъанара заана хъуркьувалар ишри.
