Мейлан Нежефов

Инсандиз, фургьанди ипIруб-убхъруб ва алабхьруб ашра, жвуван жандин сагъламвал дарухъанмина сабра, ул’ин иливишкьан, рябкъюрдар. Гьациб дюшюш уз’инра улубкьну – гагул терефнан улиз хайлин вахтна чарч илипнайиси рябкъюри гъабхьнийиз. Мидин гьякьнаан жямяаьтлугъ кас, сагъламвалин тешкилатчи, Дагъустандин Халкьдин Игит Исмяил Исмяиловдин ччвурнахъ хъайи Медицинайин заан технологийирин центриз илтIикIнийза.

Регистрация апIбалан кьяляхъ йиз дердназ дарман апIуз му идарайин кIулин духтир Муслим Исмяиловдихьна (Исмяил Исмяиловдин бай) 2-пи мертебайиз удучIвнийза. Дугъан теклифниинди, жвуми йигъан лазерин кюмекниинди йиз улин операция гъапIнийи. Юкьуд йигъандин арайиъ гьадушваъ имиди гъахьунза.

Фикир мапIанай, узу кьастлуди душван тяриф апIура, ясана душваъ узуз чIанади операция гъапIну кIури. Ваъ. Духтир Муслим Исмяилович пишекарвалин рякъюъ чаз тувнайи профессор ва илмарин духтир ччвурариз лайикь ву. ИпIрубдин, дахъру йишван, марццишнин – саб терефнахъандира дугъу идара апIурайи центрин ляхник синих кипуз шулдар.

Жвуван дердназ дарман гъабхьиган, хъугъай, туву кепек-шигьира рябкъюрдар. Ав, гъи улиз гьубкIну ва бегьемди рябкъюб кьисмат гъабхьнийиз. Узухъди палатайиъ гъахьи Чечен республикайин агьали Асланра разиди ву. Дугъу кьюбиб уларинра лазерин операция гъапIнийи.  Дугъахъди кми-кмиди гафчIал айиз, ва гъи думу хусуси метлеб айи дявдин операцияйин иштиракчира ву.

Саринкьа уларин рябкъювал кьит дарибшри. Хъа гъахьиш, теклиф вуйиз, аьхю гьярфналан вуйи духтир Исмяил Исмяиловдихьна илтIикIуб!