Зубайдат Шябанова
Улихьна йигъари Табасаран райондин культурайин хулаъ Урусатдин машгьур художник Сергей Марченкойин хусуси метлеб айи дявдин операцияйин иштиракчйириз бахш вуйи графикайин шикларин йишвлан йишв’ина гъабхру «Донбассдин кIару гъван» выставка гъабхьну. Думу выставка Президентдин культурайин жягьтлуваларин фонднан кюмекниинди гъабхурайиб ву.
Выставкайиз лигуз гъафидарин улихьна художникди ритиндихьди гъизигу 26 портрет адагънийи.
Художникдин гафариинди, ритиндиинди шиклар зигувал дугъу хабарсузди ктабгъуб дар. Крафт (ижми жюрейин сасри аку михек рангнан) кагъзиин ритин иливувал – му кIару гъвандиинди варитIан гизаф девлетлу вуйи Донбассдин лишан ву.
Сергей Марченкойи Москва шагьриъ айи вахтна дугъаз Табасаран райондин главайин теклифчи, табасаран драмтеатрин директор Аьлимурад Аьлимурадовдикан хусуси метлеб айи дявдин операцияйиъ Табасаран райондиан гизаф эскрар айиваликан гъеебхьну. Дагъустандиз чан выставка хьади гъафибси, дугъу Табасаран райондизра гъягъюз кьаст гъапIну.
Художникдихъди ва дугъан уьмрин юлдаш Екатеринайихъди Табасаран райондиз военный мухбир Марьяна Наумова кIулиъ ади Урусатдин телевидениейин Сабпи каналин дестера гъафну.
Марьяна Наумовайи чав багарихьди цIийи телепроект гьяракатнаъ ипрайиваликан мялум гъапIнийи.
«Дагъустандиъ эскрариз вари терефариан кюмек туврайиваликан ва аьхю гьюрмат айиваликан вари Урусатдин ватандашариз аьгъю дубхьну ккундузуз. Гъийихдар гьархудархьа ва кьяляхъ гъюрудар игитарси къаршуламиш апIурхьа», – гъапнийи дугъу ва чан улхбаъ Табасаран райондин главайиз хусуси метлеб айи дявдин операцияйиъ кечмиш гъахьи эскрарин гьюрмат уьбхюрайивализ чухсагъул мялум гъапIну.
Сабпи каналин съемочный дестейи Табасаран райондиан вуйи эскрарикан ва чпин дерд кIваъ уьтIюбкьну, юкIв ижми дапIну лихурайи бабарикан передача гьязур апIура. Дурарин гьисабнаъ Армине Аьбдуризаева ва Наиле Аьлибегова а. Сергей Марченкойи му дирбаш дишагьлийирин веледар Мягьямед Аьбдуризаевдин ва Аьзиз Аьлибеговдин суратар ритиндихьди гъизигну.
Выставкайин кьяляхъ узу Дагъустандин «Бабарин кьувват» дестейин Табасаран райондиъ айи куратор ва Табасаран райондин хусуси метлеб айи дявдин операцияйиъ кечмиш гъахьи эскрарин бабарин «Бабарин дих» дестейин кIулиъ айир Армине Аьбдуризаевайихъди сюгьбат гъапIнийза.
«Выставкайиъ иштирак шулайи Урусатдин Сабпи каналиан дуфнайи журналистари хусуси метлеб айи дявдин операцияйиъ кечмиш гъахьи йиз бай Мягьямеддикан, узу райондиъ эскрарин бабарихъди гъабхурайи ляхникан гьерхнийи. Узу дарпишра, художник Сергей Марченкойи йиз балин сурат имбу эскрарихъди вари Урусат вуйибси хьади лицура. Дугъу Дагъустандиан вуйи 26 эскрин шиклар гъизигну. Дурарин гьисабнаъ кьюр табасаран баярра а. Сар – йиз Мягьямед, ва тмунур Ярса гъулан бай Аьзиз Аьлибегов ву. Художникди ктибтганси, дугъахьна портретар зигуз гъийиху эскрарин шикларихъди гьарсар эскрин биографияра хътапIнийи. Дугъан кIваз варитIан тясир гъапIуб йиз Мягьямадди чан бализ дявдиан гъибикIу кагъаз гъабхьну.
Марьяна Наумовайихъди вуйи сюгьбат райондиъ хусуси метлеб айи дявдин операцияйиъ гъийиху эскрарин хизанариз туврайи кюмекнакан, гьюрматнан ва кIваин уьрхбан серенжемарикан гъабхьнийич. Аьхиримжи вахтари райондиъ 15-20 хизандиъ баяр дийихна. Дурариз му учIру дерд ва аьхю хажалат ву. Думу хизанарин вакилар ич дестейиз гьеле гъадагънадарча. Дестейиъ гьарсари чан дерд, чан убгурайи кIван гьарай ачухъ апIуру. Думу варидарихьан аьгь апIуз шулдар. ЮкIв сацIиб яваш шайиз вахт лазим ву. Магьа гъира сар дишагьли кьабул гъапIунча, ва ич дестейиъ 135 кас гъахьну. Гьар йигъан хябяхъган кьюр эскрихъан зикур урхури шулча. Аллагьди кьабул апIри», – гъапнийи Армине Аьбдуризаевайи.
