Гюльнара Мягьямедова

Элгьет йигъан аэропортдиъ гъахьи пашман гьядисйирикан чан фикрар ккун апIури, редакцияйин журналистар жямяаьтлугъдин, диндин вакиларихьна илтIикIну. Табасаран райондин имамарин советдин председатель Ансар Рамазановди гьамци гъапну: «Дугъриданра, улихьна йигъари аэропортдиъ ихь жигьилари гъапIу къанунсуз ляхнари ухьу мюгьтал ва пашман дапIна. Палестинайиъ духьнайи гьядисйири мусурмнарин юкIвар хажалатну абцIна.

Жигьилари аэропортдиъ чпи гъапIдарстар къайдасузвалар сарун текрар дапIбан бадали, аьлимари, муфтиятди чпихьан шлуб вари апIура. Дициб, жигьилар гъаврикк ккаъбан ляхин аьлимари йигъ-йишв дарпиди, гьамусра гъабхура. Гьар йигъан гвачIнинган гъудгниз уч гъахьи диндин вакилари гъудгнин кьяляхъ Аллагьдикан Палестинайиъ ислягьвал дебккуб, душваъ зийнар духьнайидариз, хал-йишвахъ мягьрум духьнайидариз кюмек ккун апIури, дюъйир урхура. Митингарикан улхуруш, сар имамдира, сар аьлимдира дидин тереф дибиснадар.

Ухьхьан апIуз шлу кюмек – сабур апIуб, Аллагьдикан кюмек ккун апIуб ву.

Жигьиларикан ккун апIурхьа: жвуваз фуж вуш аьгъдру, саб ражнукьан дяркъну адру касдихъ хъпехъури, интернетдиъ, соцсетариъ шли-вуш фу-вуш гъибикIну кIури, къанундиз аькси вуйи чIуру рякъюъди душну ккундар. Ухьу бадали, ихь рягьятвал бадали, гьюкуматди дапIнайи дараматариин алжагъуз хай даршул», – гъапнийи Табасаран райондин имамди.