Наргиз Гюлечова

20-пи декабриъ Мягьячгъалайин «Королевский дворец» шадлугънан серенжемар гъахру залиъ жюрбежюр уьзрариан иццурайи 200-тIан артухъ бицIидариз ва дурарин дадйириз вуйи рягьимлувалин серенжем кIули гъубшну. Серенжемдин сабпи пай, сакьатвал кайи бицIидариз Къумугъ театриъ спектакль улупбалан ккебгънийи. Гьадлин вари сатIиди кьюбпи пайназ гъафнийи.

 

Сакьат бицIидариз вуйи шаду машквран тешкилатчи, рягьимлу юкIв айи ихь ватанагьли Диана Уьсманова ву. Рягьимлувалин серенжемар тешкил апIури, му жумарт касдин 7 йис ву. ЦIиб улихьнаси учу газатдиъ дугъкан ва дугъу апIурайи ляхникан яркьуди гъибикIнийча.
Сагъламвалик шикас кайи касарин Йигъаз бахш вуди тешкил гъапIу рягьимлувалин серенжемдиъ Халкьдин Собраниейин депутатари, машгьур спортсменари, жямяаьтлугъ касари иштираквал гъапIнийи.
Серенжемдиз уч дапIнайи бицIидариз ва рягьятвал гъадабгъуз хъади дуфнайи дурарин абйир-бабариз ицци хурагар, жюрбежюр шаду ва маракьлу конкурсар гьязур дапIнайи. Гафар апIуз, лицуз ва ергуз чпиз читинвал кашра, мина уч духьнайи бицIидар гьарсаб конкурсдиъ лап аьшкьниинди иштирак гъахьнийи.
ЦIийи йис улубкьурайивализ лигну, уч духьнайи вари бицIидариз меълишнар айи пакетарра пешкеш гъапIнийи.

«Му серенжемдиз гъюз ул хъади, амма жюрбежюр себебариан гъюз дархьи касарра гизаф ими. Хъа серенжем тешкил апIбан бадали, дурари чпихьан шлу кюмек дапIна. Эгер гьацдар касарин кюмек дайиш, узхьан гъи, гьамкьан инсанар уч дапIну, му аьхю мярака гъабхуз, му бицIидар рази ктауз шулдайи. Гьаммишан хулаъ ади, чписдар бицIидар дярякъри я тамшир дарапIри айидар рази ктаувал, йиз фикриан, варитIан ужуб ляхин ву. Му серенжем тешкил апIуз узуз кюмек туву вари касариз чухсагъул пуз ккундузуз», –гъапну Дианайи.
Шадлугънан серенжемдиз дуфнайи дадйири, чпи ва чпин веледар кIваин дапIну, мициб аьхю ва шаду мярака тешкил апIбаз, Диана Уьсмановайиз чпин терефнаанра чухъсагъул гъапну.