Гюльнара Мягьямедова
27-пи феврали Дагъустандин Глава Сергей Меликовди ИТАР ТАСС-диъ, уьлкейин журналистарин суалариз жавабар туври, пресс-конференция гъубхну.
Пресс-конференцияйин сабпи пайнаъ Меликовди Дагъустандин артмиш’вал гьяракатнаъ ипбан бадали кьабул дапIну ккуни уьлчмйирикан мялуматар тувнийи. Дугъу гъапиганси, республикайин гьюкмари гьар гьяфтайиъ, электроэнергияйихъди тямин апIбан аьрзйирра кади, агьалйирин теклифариз, аьрзйириз фикир тувра. 1960-пи йисарин гьацIхъанмина электроэнергияйин циркил артмиш апIбаз пулин дакьатар жара апIури адрувализ дилигну, циркил лап йирси гьялназ дуфнайи. Гъи варитIан учIру месэла республикайин агьалйир мюгькамди электроэнергияйихъди тямин апIуб ву. Сергей Меликовди бицIидарин цIийи багъар, мектебар тикмиш апIбан, айи мектебар рас апIбан чарасузваликанра гъапнийи.
«Яшамиш шлу хулар тикмиш апIувал ва шагьрин аьтрафар яркьу апIувал Дагъустандиз гизаф важиблу месэла ву. Циркил ужуди артмиш шула, хъа Урусатдин жара шагьрариъ айи уьмуми къайдйир республикайин шагьрариъ уьрхюрадар», – тикилишчиваликан вуйи суалназ жаваб туври, къайд гъапIнийи Сергей Меликовди. Дугъан гьисабариинди, гъийин йигъаз Мягьячгъалайина Каспийскдиъ, тикилишчивалин къайдйир чIур дапIну, 470 хулар ишлетмиш’вализ тувна. Республикайин шагьрариъ думу жюрейин тикилишчивал дубхьну ккундар.
«Суддин къарарниинди, улихьна сар эйсийин хусусиятнаъ айи Мягьячгъалайин ЖКХ-йин гъурулуш республикайин хусусиятназ тувну. Гьамус думу, региондин операторихьна тувну, гьюкуматдин гюзчиваликк хьибди. Гьамцдар ляхнари региондин аьтрафарин артмиш’валариз рякъяр ачухъ апIура», – гъапнийи Сергей Меликовди.
Пресс-конференцияйиъ республикайин кIулиъ айири Урусатди гъабхурайи хусуси метлеб айи дявдин операцияйиъ багахьлуйир гъийихдариз кюмек тувбан бадали 2022-пи йисан феврали ачмиш гъапIу «Вари сатIиди» фонднаканра ктибтнийи ва гьадму терефнаан ляхин гъабхурайи жямяаьтлугъ тешкилатарихъди аьлакьа уьбхбан важиблувал къайд гъапIнийи.
Республикайин кIулиъ айири Дагъустандиъ деврин тIалабариз жаваб тувру спортдин гъурулушар, спортдин серенжемар гъахбан тажруба айивализ дилигну, жюрбежюр кчIихбариан талитар гъахуз гьязурди айиваликанра гъапнийи. Сергей Меликовди региондин гизаф спортсменар, жюрбежюр гъууллугъариъ ади, СВО-йин иштиракчйир вуйиваликан, гьадрарикан гизафдар чпин хушниинди дявдин операцияйиз душнайиваликан хабар тувнийи. Дугъан гафариинди, гьамди Дагъустандиъ ватандашарин ватанпервервалин дережа заанди вуйивал субут апIура.
«Дагъустанди Палестинайиан гьергну дуфнайи хизанар кьабул дапIна, гележегдиъ дурарикан гьапIбанди ву?» – суалназ жаваб туври, Сергей Меликовди гьамци гъапну: «Дагъустандиъ Палестинайиан дуфнайи 150-риинакьан кас яшамиш шула. Дурар варибдихъди тямин дапIна. Палестинайиан дуфнайи духтрарин саб пай Урусатдиъ гъурхдар вушра, дурарин духтирвалин квалификация ахтармиш дапIну ккунду. Гьаддин кьяляхъ дурар Дагъустандиъ ляхниз гъадагъиди, хъа бицIидарихъди дарсар гъахура, дурариз урус чIал улупура».
Аьхю иштагьниинди Меликовди йигинди артмиш шулайи туризмдин циркликан вуйи суаларизра жавабар тувнийи. Дугъу гъапиганси, Дагъустандиз гьар йисан рягьятвал гъадабгъуз гъюрайи туристарин кьадар 500 агъзуриинакьан за шула. Гъубшу йисан республикайи 1 миллионна 700 агъзур турист кьабул гъапIну. Гьаму йисанра думутIан артухъ кьадарназ ккилигура ва цирклиъ деврин шараитар яратмиш апIбиин лихувал давам апIура.
Гьелбетда, пресс-конференцияйиъ Сергей Меликовди ктуху ва хъана жара месэлйир гьял апIуз гъабхьиш, агьалйирин яшайишдин дережа за шлувалик умуд кивурхьа. Хъа гьюкмин кIулиъ айидариз республикайин агьалйир даягъ дархьиш, думу месэлйир гьял апIуз хьибдар. Гьаддиз ухьу гьарсари ихь яшайишдин дережа за апIуз кюмек дапIну ккунду.
