Гюлягьмад Маллялиев
2-4-пи мартди Владикавказдиъ 16 йис яшар дархьи спортсменарин арайиъ юкьяр дисбаан Урусатдин первенство кIули гъубшну. 15 региондиан вуйи 300-дихьна живанар иштирак гъахьи му талитар Табасарандин спортдин тарихдиъ учIвну. Москвайин сборный командайин дахилнаъди талитариъ иштирак гъахьи Мягьямед Гьямидовди 48 кг гъагъ айи спортсменарин арайиъ 1-пи йишв гъадабгъну ва гьаму спортдиан табасаранарин арайиъ Урусатдин сарпи чемпион гъахьну.
Мягьямед Эмиржанович Гьямидовдин ччивар Та-басаран райондин Заан Гюгьрягъан ккергъра. Думу 2009-пи йисан Ивановский областдиъ бабкан гъахьну. 2022-пи йисхъанмина Москва шагьрихъан вуди юкьяр дисбан талитариъ иштирак шула. БицIи вахтнан арайиъ тренер Рустам Муртузялиевдин хиликк гьязур шули, дугъу хайлин хъуркьувалар гъазанмиш дапIна. Гьаци 2022-пи йисан 14 йис дархьи живанарин арайиъ Москвайин чемпион, 2023-пи йисан 16 йис дубхьнадру спорт-сменарин арайиъ Москвайин чемпионатдиъ пешкешнан йишв, хъа 2024-пи йисан 1-пи йишв гъазанмиш гъапIну.
Гьамусяаьт Гьямидоварин хизан Дербент шагьриз удучIвну дуфна, ва Мягьямедди Дербентдин «Компромисс» клубдиъ юкьяр дисбаан спортдин аьгъювалар Исрафил Аьбдуллаевдихь ва Мирза Новрузовдихь гъадагъура.
Мягьямеддин спортдихьна рякъ аьдатиб гъабхьну. Сифте дугъу футболист хьуз ният гъапIнийи, ва дугъан адаш Эмиржанди думу футболин секцияйиз гьаънийи. Эмиржан Гьямидовди чавра думуган сифте Ивановский областдин «Заволжск», хъасин «Ротор» командйириъ футбол уйнамиш апIури гъахьну. СацIиб герендилан 5-йисаъ айи Мягьямедди, футболиъ жвуван хъуркьувалар анжагъ сар чалан асиллу дарувал гъябкъюри, думу спорт дипру. Таниш касарикан, мирасарикан чан адашди жигьил вахтна юкьяр дисбаан ужудар хъуркьувалар гъадагъуваликан (Эмиржан Мягьямедов саб-швнуб ражари Волгоград шагьрин чемпион гъахьну, Урусатдин чемпионатдин полуфинализ удучIвну), чан рягьматлу абайинра му спорт гизаф юкIв алиб вуйиб аьгъю гъабхьи бицIи Мягьямеддиз чан уьмур юкьяр дисбан спортдихъди аьлакьалу апIуз ккун шулу.
Гьелбетки, сифте йисари вари сакIалди дайи. Гизаф шагьрариъ талитариъ иштирак шули, думу гъалибра шуйи, магълубра. Думуган Мягьямед сабдин гъавриъ ахъну – анжагъ дурумлу зегьметну ужудар натижйирихъна хуру. Танишдарихъди, имйирихъди, мирасарихъди вуйи гафар-чIаларра дугъан гизафси спортдикан шуйи, ва дустарра асас вуди спортсменар вуйи.
Жигьилин хъуркьуваларик дугъан адаш Эмиржандинра аьхю пай ка, фицики хизандиз асас гъазанж хурайи ляхинра гъибтну, дугъу чав Мягьямед Урусатдин жюрбежюр шагьрариз талитариз гъахури гъахьну. Гьелбетки, бализ жвуван тажрубайиан насигьятар туври, юкьяр дисбан спортдин сирар ачухъ апIури гъахьну. Ва му зегьмет зяяди гъюдубчIвундар.
Владикавказдиъ гъахьи талитарин натижайиъ Урусатдин сатIи вуйи команда дюзмиш гъапIну. Дидин дахилназ Мягьямед Гьямидовра гъадагъну.
Жигьил спортсмендин планариъ юкьяр дисбаан Европайин чемпион хьувал а. Хъа Аллагьди сагъвал тувну, мюгьлет гъабхьиш, олимпийский тамшириъра иштирак хьуз ккунду. Хъа гьелелиг думу гьарсаб тренировкайиъ ургуб амкI адапIури, гележегдиъ гъалибваларихьна гьязур шула.
