Умгьанат Сулейманова
Гьар йисан, аьхълушнарин фасил улубкьган, шагьрарин агьалйирин хулар ва социальный объектар манишнихъди тямин апIурайи идарйирин асас вазифа манишин тувру гъурулуш вахтниинди гьязур апIувал шулу. Аьхиримжи йисари Дагъ.Огни шагьриъ му ляхин гьам ерли гьюкмарин, гьамсан шагьристанарин кIулин бала дубхьнайи.
Шагьрин кIулиъ айи Жалалутдин Аьлиризаевди хулар ва социальный объектар манишнихъди тямин апIру гъурулушар лап йирси духьнайивалин ва дурар гьюдюхну ккунивалин месэла швнуб-сабан республикайин правительствойин, тялукь министерствйирин улихь гъитIибккури гъахьну. Му месэла бегьемди гьял апIбан бадали Дагъ. Огни шагьур «Кафари Кавказдин федеральный округдин артмиш’вал» гьюкуматдин программайиъра иштирак шула. Программайиъ улупнайи серенжемар 2023-2025-пи йисари кIулиз адагъиди. Аьхирки му учIруди дийибгънайи ва учIвру дубхьнаи месэла цци гьял апIуз удукьну.
Дупну ккундуки, Совет гьюкуматдин вахтна Дагъ.Огни шагьур жюрейин аьхю гъул вуйи, ва гьадмугандин агьалйирин кьадариз лигну, дизигнайи инженерный гъурулушар дигиш дарапIри гъира ишлетмиш апIури имийи. Шагьур лазим вуйи канализацияйин турбйирихъди анжагъ 15 процентдинтIан тямин дапIнадар. Хъа ляхник кайи турбйир 80 процент йирси духьна. Йислан-йисаз шагьриъ дуланмиш шулайи агьалйирин кьадар артухъ шула, гизаф мертебнан аьхю хулар дивра, баяр-шубар урхурайи миржиб мектеб, бицIидарин багъар лихура. Гьелбетда, ляхник кайи коммунальный гъурулушариин аьхю гъагъ ал, дурарин кьувват гьубкIрадар.
Улихьна йигъари Дагъ. Огни шагьрин мэр Жалалутдин Аьлиризаевдин буйругъниинди, сифте кIул’ан ургуб мектедиъ ва бязи бицIидарин багъариъ деврин цIийи котельнийир дивну. Думу ляхнин гьякьнаан шагьрин агьалйирира шагьидвал апIура. Хъасин цIийи котельнийир гизаф мертебйирин аьхю хулариъра дивуз хъюгъну.
«ЮгпроектСтрой» тешкилатдиъ проектар гьязур апIрурди лихурайи Низами Къурбановдин гафариинди, цIийи йис кубкIайиз шагьрин 33 кючйириъ штун ва канализацияйин цIийи турбйир зигиди. Му ляхин кьюб бригадайи кIули гъабхиди. Гьелбетда, турбйир дигиш гъапIу йишварихь штун даграр ва кьалушнар хьиди, гьаддиз дугъу шагьристанарихьан цIибди сабур апIуб ккун апIура. Расвалин ляхнар ккудукIиган, асфальт улубзну, аьхю пай кючйир айибтIан гюрчег апIиди.
Шагьриъ аьхиримжи йисариъ ужувлахъинди хайлин дигиш’валар духьна. Дагъ.Огнийиъ варитIан гъагъи меселйир штун ва кючйирин рякъярин вуйи. Дурарра яваш-явашди гьял шула. Магьа йисариинди кIулиз адабгъуз даршулайи ляхинра – шагьрин социальный объектар ва хулар чвлинна кьюрдун цIийир аъру фаслихьна вахтниинди гьязур хьувал – цци гьял гъапIну. Умуд кивдихьа, имбу ляхнарра багарихьди гьял апIуз удукьиди.
