Зубайдат Шябанова
1-пи апрели Табасаран райондиъ Табасарандин ва Дагъустандин машгьур шаир Шамиль Къазиев бабкан духьну 80 йис хьпаз тялукь дапIнайи серенжем кIули гъубшну.
Серенжемариъ Табасаран райондин главайин заместитель Заур Мусаев, Табасаран секцияйин регьбер Сувайнат Кюребегова кIулиъ ади Дагъустандин писателарин союздин десте, «Ппази» журналин редактор Феруза Ражабова, Мягьячгъалайиъ айи табасаран халкьдин агьли касарин советдин председатель Исамудин Рамазанов, меценат Айваз Рамазанов ва хайлин жарадар иштирак гъахьну.
Хялари ва серенжемарин тешкилатчйири чпин программа Табасаран райондин модельный библиотекайин гъвалахъ хъайи шаирин ядигарихъ кюкйир дивбалан ачмиш гъапIнийи. Хъасин хяларин делегация, райондин администрацияйин гъуллугъчйир, райондин образованиейин управлениейин ва библиотекайин гъурулушдин вакилар вари сатIиди Шамиль Къазиевдин багъри Гуми гъулаз гъушну ва душваъ шаирин гьюрматназ дурари шадлугънан митинг гъубхну.
Митингдиъ иштирак шулайи хялари, мектебдин мялимари ва гъуландари М. Горькийин ччвурнахъ хъайи Литературайин институт ккудубкIбан кьяляхъ багъри мектебдиъ мялимди лихури гъахьи, хъасин Дагъустандин китабарин чапханайин редакторди гъилиху бажаранлу шаир мани гафариинди кIваин гъапIну.
Шамиль Къазиевдин «Руг ва рюкъ», «Ахсрарин нефес», «БицIидариз вуйи ихтилатар», «Тавхана» ва хайлин жара шиърарин гъварчариз дугъан яратмишар кьабулди вуйи инсанарин юкIварихьна хусуси рякъ гъибихъну.
Шадлугънан мярака Хючна гъулаъ модельный библиотекайиъ давам гъабхьну. Райондин ЦБС-дин директор Рафик Аьлиевди хялар ва иштиракчйир къаршуламиш гъапIну ва библиотекайиъ дагъустандин литературайин секция яркьу апIурайиваликан ва гьадушваъ дагъустан литературайин артмиш’валик баркаллу пай киву машгьур шаир Шамиль Къазиевдин яратмишар гьаммишан рякъру йишв’ина адагъруваликан гъапну.
Шаир кIваин апIури, Сувайнат Кюребегова, Феруза Ражабова, райондин депутатарин собраниейин председатель Иса Исаев, образованиейин управлениейин кIулиъ айи Аьбдусалам Гьясанов, шаирар Аьбдулмажид Къурбанов, Аьбдусалам Асланов ва хайлин жарадар удучIвну гъулхну.
Серенжемдин аьхириъ Хючна гъулан лицейиъ ва Табасаран райондин гимназияйиъ урхурайидари Шамиль Къазиевдин «Хъинцамегьмер» ихтилатнаан бицIи сягьна улупну ва модельный библиотекайин вакилари шиърар гъурхну.
Шаирин гььюрматназ бахш дапIнайи серенжемарин кьяляхъ узу Дагъустандин писателарин союздин табасаран секцияйин кIулиъ айи Сувайнат Кюребеговайихъди сюгьбат гъубхнийза. Дугъу къайд гъапIганси, шаирин юбилейихъди аьлакьалу йигъ фикир тутрувди гъибтуз шлуб дайи.
«Шамиль Къазиевди Табасаран Урусатдин дережайиз адабгъну. Дугъан яратмишар ихь халкьдин сурат ву. Дугъу дагъустандин литературайин артмиш’валик аьхю пай кивну. Къазиевди таржума дапIнайи табасаран фольклори табасаран халкьдин марцци рюгьнан девлет вари дюн’яйиз ачухъ гъапIну», – гъапнийи Сувайнат Кюребеговайи.
Ав, Сувайнат Кюребегова, дугъриданна, дюз ву. Шамиль Къазиев ихь табасаран литературайин хяд, гавагьир гьисаб шула. Дугъу, чан яратмиш апIбарииндиси, ватандаш’валин, ватанпервервалин гьиссарииндира чав лайикьлу табасаранжви вуйиб улупну.
«Шаир халкьдихъ ва ватандихъ шулайиб ву. Гьадму халкьдихъ ва ватандихъ деерцIнайи шаир вуди гъахьну Шамиль Къазиев. Табасарандиз юбилей къайд апIуз гъягъруган, узу ихь шубуб жямяаьтлугъ тешкилат сатIи гъапIунза. Дурар Дагъустандин писателарин союз, Табасаран халкьдин яшлударин совет ва, руководитель, жямяаьтлугъ кас Айваз Рамазанов кIулиъ ади, «Табасарандин ватанперверар» тешкилат. Ич метлеб – Шамиль Къазиевдин юбилей къайд апIуб ва ихь халкьдиз шаирари халкьдин сурат яратмиш апIурайиваликан сабансан кIваин апIуб вуйич.
Халкьдин сурат, дуланажагъ ухьуз, тарихдианси, литературайианра ашкар шулахьуз. Гьадму литературайин эсерариъ ухьу фужар вуш, наънан вуш ачухъди улупура. Улихьди шаирарин эсерар халкьдин арайиъ тарагъури гъахьну. Гъузнайи эсерариинди ухьу ихь ччивар агурахьа.
Шамиль Къазиевдикан ктибтури, сабсана пуз ккундузуз. Республикайиъ «Къазиевдин шиърар урхуб» фестиваль айиб ву. Гьадму фестиваль улихьна йисари Табасаран райондиъ хъади-хъади гъабхури гъахьунча. Гьаму йисанра ихь районарин вари мектебариъ урхурайидарин арайиъ думу фестиваль гьяракатнаъ ипна. Фестиваль конкурс къайдайинуб ву. Душваъ варитIан ужиди шаирин эсерар гъурху шубур кас гъядягъюру. Шамиль Къазиевдиз бахш дапIнайи аьхю мярака – «Поэзияйин вечер» – гъябгъюрайи йисан апрелин вазлин аьхирариъ шулу, ва гьадму мяракайиъ фестивалин гъалибчйирра ашкар хьиди», – аьлава гъапIнийи Сувайнат Кюребеговайи.
