Гюльнара Мягьямедова
11-пи октябриъ Дагъустандин Глава Сергей Меликов Дербент шагьриз гъушну. Душваъ республикайин кIулиъ айири яшайишдин дараматар ахтармиш гъапIну, яшайишдин кюмек тувру ва сакьат бицIидарин реабилитация гъабхру Центр ачмиш апIбан серенжемдиъ иштирак гъахьну.
КIваина хурача, гьаму йисан июндин вазлин аьхириъ Урусатдин Президент Владимир Путин Дербентдиз гъафнийи. Дугъу душваъ туризмдин артмиш’вализ бахш дапIнайи совещание гъубхнийи. Гьаму кюгьне шагьриз гъюбан кьяляхъ, уьлкейин кIулиъ айири шагьрин артмиш’вализ 5 миллиард манат деебтуз къарар адабгънийи. Думуган Сергей Меликовди пулин дакьатар шагьрин инфраструктура цIийи алапIбаз ва яшайишдин дараматар тикмиш апIбаз харж дапIну ккуниваликан гъапнийи.
Сергей Меликовди спортдин дарамат тикмиш апIурайи йишвра ахтармиш гъапIнийи. Каспий гьюлин гъирагъдихъ 2500 касдиз йишв айи спортдин аьхю комплекс ерлемиш хьибди. Душваъ гизаф метлебариз ишлетмиш апIуз шлу залар, форумар ва жюрбежюр серенжемар гъахуз шлу йишвар хьиди. Комплексдиъ спортдин кчIихбариин ва жара жюрейин талитариин машгъул вуйи спортсменари тренировкйир гъахиди. Тикилишчивалин ляхнар 2026-пи йисан аьхириз ккудукIувал планламиш дапIна.
Сергей Меликов гьацира канализацияйин чиркин шид марцц апIру цIийи гъурулушдин дараматдиинара гъушну. Гъурулуш тикмиш дапIну ккудубкIна. Гьамусяаьт арайиъ гъузнайи камивалар дюз апIура. Дербент шагьрин мэр Рустамбег Пирмягьямедовдин гафариинди, ноябрь вазли шид хъархъв-сарихьан марцц апIбан сабпи дережа (механический) либхуз хъюбгъди. Шид марцц апIру гъурулушди канализация-йин турбйириъди гъябгъру чиркин шид хъархъвсихьан, гъумрахьан ва жара зирзибилихьан марцц апIиди. Объектдихьан сад йишвандинна йигъандин арайиъ 25 агъзур кубический метр шид марцц апIуз шулу.
Гъюру йисан мартдин вазли биология жигьатнаан шид марцц апIбан ляхнихъ хъюгъювал планламиш дапIна.
«Му Дагъустандиъ шид марцц апIру сабпи ва гизаф важиблу объект ву. Гьяйифки, думу вахтниинди ляхник кипуз гъабхьундар. Дагъустандин жара шагьрариъ шид марцц апIру дараматар дивруган, Дербентдиъ деету камивалар текрар дарапIбан бадали, гъалатIарин ва камиваларин анализ дапIну ккунду», – гъапнийи Сергей Меликовди ва РД-йин тикилишчивалин министрин сарпи заместитель Александр Нестеровдиз мидин гьякьнаан табшуругъар тувнийи.
Канализацияйин чиркин шид Каспий гьюлиз гъябгъюрайивалин ва диди хурайи зарарнан месэла Владимир Васильев республикайин кIулиъ айиган гъитIибккнайиб вуйи. 2018-пи йисан Урусатдин Президент Владимир Путин Дагъустандиз дуфнайи вахтна, дугъу чиркин шид марцц апIру гъурулушар тикмиш апIбан месэла гьял апIуз гаф тувнийи. Амма думу месэла гъира гьял дапIну ккудубкIнадар.
Сергей Меликов Дагъустандин гьюкмин кIулиз гъафиган, дугъу тамам дапIну ккуни проектарин сабпи йишв’ин республика хъархъвсихьан марцц апIувал, канализацияйин чиркин шид марцц апIру гъурулушар къайдайиз хувал алийи. Ухьуз рябкъюрайиси, дугъу чан кIул’ина гъадабгъу ляхин яваш-явашди тамам апIура.
