Мейлан Нежефов

«Ккундуш увуз яв Ватан, гьяйиф мапIан дидиз яв жан». Му абйир-бабарин мисалнаъ ватандашвалин шартIси улупнайи имтигьян ихь ватанагьлийири вари дюшюшариъ жавабдарвалиинди тувра. Абйириланмина гъюрайи му гьиссар аргъаж шулайи насларира чпин гъянаъ уьрхюра. Ва лазим гъабхьиган, вафалувалиинди Ватандин гъуллугънаъ дийигъну, дурари чпин жанарилан хил алдабгъну, гюлдихь мухур гьивра.

 

Хив райондин Ургъа гъулаъ яшамиш шулайи Агъабала ва Мюгьюббат Гьясановарин хизан гьацдар игит баяр тербияламиш гъапIу хизанарикан саб ву. Аферин дурариз. Гъи дурарин баяр – Рафикди, Арсенди ва Апрели – Украинайиъ гъябгъюрайи хусуси метлеб айи дявдиъ заан дирбаш’вал улупура.
Дурар Жуковдин, Суворовдин, «Жюрэтлувализ лигну» ва хусуси метлеб айи дявдин операцияйин медалариинди лишанлу дапIна, йицIбариинди чухсагъул мялум апIбан кагъзарин эйсйирра ву.
Гьамусяаьт бицIину бай Арсендин чвурнахъ райондин ва гъулан администрацйирин главйириз, дарс киву мялимдиз ва абйир-бабариз гьюрматнан кагъзар дуфна. Мидланра савайи, думу «Дагъустандин халкьдин игит» кIуру медалинра сагьиб гъахьну.

Медаль адашдихьна ва дадайихьна райондин глава Ярмет Ярметовди гъурубкьнийи. Чан улхбаъ дугъу вари райондин агьалйирин терефнаан, Ватандин кьягьялариз тувнайи ватанпервервалин тербияйиз чухсагъул мялум апIури, мани гафар гъапнийи.