Зубайдат Шябанова

Табасаран райондиъ «Кавказ» федеральный трассайин СиитIич — ТIаттил машинарин рякъюъ расвалин ляхнар давам шула.

 

Гьамусяаьт расвалин ляхнар «Инфраструктура яшайиш бадали» милли проектдин дахилнаъди рякъюн 28-пи километриан 32-пи километриз манзилнаъ гъахура.

Думу рякъю 15 агъзурихьна агьалйир яшамиш шулайи гъулар райондин центр Хючна гъулахъди, Дербент шагьрихъди аьлакьайиъ хьувал тямин апIури, райондин яшайишдинна экономикайин цирклин артмиш’валиъ важиблу роль гъабхура.
Проектдин дахилнаъ машинарин трасса цIийи алапIуб, кьалу штар гъягъру архар идирчуб, рякъюъ асфальт ва бетон улубзуб улупна.
Гьацира рякъюн хатIасузвал уьбхбан бадали уьлчмйир кьабул апIиди.

Расвалин ляхнар 2026-пи йисан октябрь вазлин аьхириз ккудукIуз планарик ка.
Табасаран райондин глава Мягья-мед Къурбановди къайд гъапIганси, гъубшу йисан Дагъустандин транспортдин ва рякъярин мяишятдин министерствойин кюмекниинди, му рякъюн 32-39-пи километрин манзилнаъ асфальт улубзуз мумкинвал гъабхьну.
Гьамусяаьт рякъюн 25-28-пи километрин манзилнан проектдинна сметайин документация тартиб дапIна. Дидин бинайиинди рякъюн расвалин ляхнар шубуд йисандин арайиъ аьхирихъна хьиди.