Гюльнара Мягьямедова
2025-пи йисан Дагъустан Республикайин гьюкуматдин мялуматарин дакьатарин цирклиъ дигиш’валар тIаъбан ляхин ккебгъну. Дидин гьякьнаан «Дагъустан» РИА-йиъ кIули гъубшу пресс-конференцияйиъ РД-йин мялуматарин ва чап апIбарин агентствойин кIулиъ айи Арсен Юсуповди гъапнийи.
«Учу мялуматарин дакьатарин кIулиъ айидарихъди гьаму месэла гьял гъапIунча, хъа гъи журналистарихъди гъахурайи дигиш’валарикан улхуз ккундузуз.
Республикайин кIулиъ айи Сергей Меликовдихъди гъахуз ккайи дигиш’валарин гьякьнаан улхбар гъахьнийич, дугъу ич теклифариз чан разивал тувну.
Улихьнаси милли чIалариинди чапдиан удучIвурайи мялуматарин дакьатарин ляхниъ дигиш’валар тIаънийхьа. Муганаз дурари гьарубди гьюкуматдин бюджетдин тешкилатдиси кIул’инди ляхин гъабхури айи. Гьамус дурар «Дагъустан» этномедиахолдингдиз гъварч дапIна. Вари газатари чпин ччвурар айиси гъитна, хъа дурарин административный идара ва бухгалтерия саб ву. Думу ляхни пулин бязи дакьатар азад апIуз, макьалйир дикIурайи журналистариз туврайи гонорар артухъ апIуз мумкинвал тувну. Журналистарин кьялан маважиб 30 проценттIан артухъ, яна 10 агъзур манатдиинди, за гъабхьну», – гъапнийи Арсен Юсуповди.
Агентствойин кIулиъ айирин гафариинди, СМИ-йин цирклиъ реформйир ккергъайиз, ахтармишар гъухну: агьалйирин Интернетдихьна вуйи хъугъвал артухъ дубхьна. Гьяйифки, чапдиан удучIвурайи мялуматарин дакьатарин эгьемият кам шула. Аьхюну пай аудитория электрондин СМИ-йин терефназ илтIибкIура. Ухьура хъпехърудар, урхрудар айи йишвахьинди илтIикIну ккунду. 2021-пи йисандин ахтармишариинди, Дагъустандиъси, Кафари Кавказдин округдиъра телевидениейихьна вуйи фикир артухъ шула.
«Дагъустан» этномедиахолдинг жюрейиинди «Дагъмедиа» арайиз хубанди духьнача. Душваз урус чIалниинди удучIвурайи мялуматарин дакьатар сатIи апIбанди вуча. КIулин редакторарихъди улхбар гъахьнийич, дурарира чпин теклифар ашкар гъапIнийи. Газатарин подписка, дурар йишв’ина рукьувалихъан журналистарин кIиццру хьидар, дурар макьалйир дикIури, чпиз айи мялуматар агьалйирихьна тувбахъ хьиди. Ихь журналистар бажаранлудар вуйихь, гьаддиз дурариз туврайи маважибра лайикьлуб дубхьну ккунду. Учу реформйир гьадму метлеб ади ккергънача.
2022-пи йисхъанмина ихь уьлкейиъ жямяаьтлугъдин цIийи гъат – хусуси метлеб айи дявдин операцияйин иштиракчйир, дурарин хизанар – арайиз дуфна. Эгер ухьу «Ватан уьбхрур» («Защитник») кIул тувнайи цIийи журнал адабгъуз хъюгъиш, йиз фикриинди, думу ужуб ляхин хьибди. Журналин дахилназ «Дагъларин жюр’этлувал» проектдин гъалибчи гъадагъбан теклиф дивраза. Журнал «Дагъмедиайин» дахилнаъ хьибди.
«Дагъустан» журнал дигиш дапIну, дидиз «Дагъустан гъи» кIуру ччвур тувбанди вуча. Сергей Аьлимовичдихъди дидин гьякьнаан улхбар духнача. Журналиъ Дагъустандин гъийин культура, туризм ва республикайин маш улупру уткан шиклар айи машар чарасуз лазим ву.
Ухьу электрондин арандиъ айи мялуматарин дакьатарин мянфяаьтлувал за дапIну ккунду. «Дагъустан» РИА-йихъан хъюгъдихьа. Думу кьувватлу апIбан бадали, кюмек лазим ву.
«Дагъустандиъ» РГВК-йиъ реформа гъабхбанди дархьа. Азад гъахьи дакьатарикан дураризра кюмек тувну, айибтIан ужуди ляхин апIбахъ хъаъдихьа», – гъапнийи Агентствойин кIулиъ айири.
Арсен Юсуповди хабар тувганси, Сергей Меликовдихъди милли чIалар уьрхбан ва дурар артмиш апIбан гьюкуматдин программа тартиб апIбаканра улхбар духна. Думу программайин координатор «Дагъустан» этномедиахолдинг дубхьну ккунду, фицики гъи милли чIалариин, дурарин артмиш’валиин варитIан гизаф ляхин гъабхурайидар милли газатар ву.
