Зубайдат Шябанова
Гьаму йигъари Волгоградский областдин Волжский шагьриъ урус шашкйириан Кьибла ва Кафари федеральный округарин чемпионат ва сабпи йишв бадали талитар кIули гъушну. Думу талитариъ Дагъустандин сборный командайи заан натижйир улупну, швнуб-саб пешкешнан йишвар гъадагъну. Дурарин арайиъ Табасаран райондианра шубур спортсмен айи.
Талитариъ яшар 14 йис хьайиз вуйи живанарин арайиъ Ягъдигъ гъулан 1-пи нумрайин мектебдиъ урхурайи Мягьямад Гьясанбеговди кьюбпи йишв гъадабгъну. Гьадму яшарин шубарин арайиъ СКФО-йин сабпи йишв бадали вуйи талитариъ кемшрин медаль Ягъдигъ гъулан 1-пи нумрайин мектебдиъ урхурайи Альфия Ражабовайи гъазанмиш гъапIну.
Ветеранарин арайиъ сабпи йишван сагьиб Табасаран райондиан вуйи, Урусатдин спортдин устад Исмяил Исмяилов гъахьну. Талитариъ гъадагъуз мумкинвал айи 9 очкойикан 5,5 очко гъазанмиш дапIну, думу ЮФО-йинна СКФО-йин чемпион гъахьну.
Талитарин кьяляхъ Ис-мяил Исмяиловди ич сюгьбатнаъ ктибтганси, чемпионатдиъ ва сабпи йишв бадали вуйи талитариъ улихьна йисаритIан цци иштиракчйир гизаф айи. Цци уьлкейин дахилнаъ учIву ДНР, ЛНР республикйириан ва Херсонский областдианра спортсменар гъафну.
«Чемпионат лап ужуди ккабалгну, кIули гъубшну. Дуфнайи 150 спортсменарикан гьарсар бажаранлу ва чемпионвалин ччвурназ лайикьлудар вуйи. Табасаран райондиан Дагъустандин командайин дахилнаъ айи Альфия ва Мягьямед узухь урхурайидар ву. Дурар гьяфтайи кьюб-шубубан узухьна Хючназ чпин абйирихъди шашкйириан аьгъювалар гъадагъуз гъюра. Кьюридра ужудар мумкинвалар айидар ву. Дагъустандин сборныйдиъ айи вари 12 шашистар талитариъ лап ужуди иштирак гъахьну. ВаритIан гизаф медалар Кизилюртдиан вуйи баяр-шубари гъадагъну. Дюзди гъапиш, бицIидариз аьгъювалар туври йиз сад йистIан дариз, хъа Къизилюртдин спортсмнариз чпин хусуси мектеб а, ва тренерихъди аьгъювалар гъадагъури думу живанарин хайлин йисар ву. Мисалназ, Амир Аьбдулягьидовдин яшар 11 йискьан дубхьнадар, амма думу 14 йис’ина яшар айи живанарин арайиъ ЮФО-йинра, СКФО-йира чемпион гъахьну. Мягьямаддихьанра сабпи йишв’ина удучIвуз шуйи. Узуз, тренер вуди, дугъан мумкинвалар аьгъязуз. Думу ужуб гележег хъайи спортсмен ву», – гъапнийи Исмяил Исмяиловди.
Исмяил Исмяиловдихъди узу сюгьбат гъабхруган, думу, чан ученик Мугьямад Гьясанбеговра хъади, урус шашкйириан Урусатдин спортдин мастервализ кандидат М.Зейналабидовдин гьюрматназ вуйи республикайин ачухъ турнириз Хасавюрт шагьриз гъягъюри, рякъюъ айи. Гъи, июлин 16-пи йигъан учуз гъафи мялуматариинди, Ягъдигъ гъулан 10 йисаъ айи Мугьямадди думу талитарин Б дестейиъ 1-пи йишв гъадабгъну.
Турнириъ Дагъустан, Чечен, Ингушетия, Саха (Якутия) республикйириан ва Ставрополь крайиан 58 спортсмен иштирак гъахьну. Талитарин иштиракчйир А ва Б дестйириз жара гъапIну. А дестейиъ айидар вари спортдин устадар ва спортдин устадвализ кандидатар вуйи.
Шиклиъ: СКФО-йин ва ЮФО-йин шашкйирин чемпионатдин гъалибчйир
