Гюльнара Мягьямедова
20-пи ноябри Мягьячгъалайиъ Поэзияйин театриъ бабан чIал’инди бикIурайи Дагъустандин халкьдин шаир, табасаран чIал’инди удубчIвурайи «Дагъустандин дишагьли» журналин редактор Сувайнат Кюребеговайи чан 60 йисандин юбилей къайд гъапIну. Думу серенжемдиъ табасаран халкьдин интеллигенцияйин вакилар, ихь шаирар, аьлимар, халкьдин депутатар, шаирихъди гизаф йисари лихурайи гъарашугъар иштирак гъхахьнийи. Саб гафниинди, юбиляр тебрик апIуз дуфнайидари зал кьикьнихъди абцIнайи.
Шадлугънан мярака Сувайнат Кюребеговайин гафариз Дагъу-стандин халкьдин артист Жамиля Гьямзатовайи апIурайи мяълийиинди ачмиш гъапIнийи.
Серенжем гъабхурайи Мягьямед Гьюсейновди мяълийин кьяляхъ РД-йин Халкьдин Собраниейин депутат Алавудин Мирзабалаевдиз гаф тувнийи. «Табасаран халкьдин булагъар дериндар, культура ва аьдатар яркьудар ву. Дурар вари, Дагъустандизси, ярхла аьтрафариъ айидаризра мялум ву. Гьамци узу гьаз кIура? Ярхла Италияйиъ ихь шаирин шиърар ужударсдар вуди гьисаб гъапIну. Узу Расул Гьямзатовдин эсерариз бахш вуйи номинацияйиъ литературайин «Парнас» кIуру конкурсдикан лихурайир вуза. Душваъ Сувайнат Кюребегова чан «Дербентдиъ дадайиз вуйи ядигарихъ» кIуру шиир хьади удучIвну гъулхнийи. Думу шиир гъурху кас автори улупнайи дадайин кIван гьиссарин, дюн’яйиъ шулайи гьядсйирин гъагъивалин гъаври шулу. Шиърин мяна ачухъ апIури, кIураза: бицIириз ккилигурайи уткан дишагьли, чан веледди сабпи гамар алдагъру дюн’я фициб шидикIан, ифди кабцIнайиб, дашсана аку ва бахтлу уьмур хъапIуз шлуб вуш, фикрарикк ккахъну, ядигарихъ дийигъна. Мицисдар фикрар дишлади гъюрудар дар, дурар чан яратмиш апIбарин натижа, дадавалин гьиссар аьгъю гъахьиган гъюру. Жара шиъриъ Сувайнат Кюребегова, шаир Багьаудин Митаровдихьна илтIикIну, ифди кабцIнайи Украина бадали яв жан тувнийна, кIури, илтIикIура.
Сувайнат Кюребеговайин пашманвалин гьенгар хъайи шиърар хъана а. Ватандин Аьхю дявдин йисариси гъира ухьу хажалатну дючIюркьнайи юкIвар гъянаъ ади, хусуси метлеб айи дявдин операцияйин кьягьялар кьабул апIурахьа. Ухьу Ватандин маракьар уьрхюз сарпидарди гъушу жигьиларин миллетдин вакилар вухьа. Ухьу гъи дамагъ кади ихь хлинццар гьатIарццнахьа, фицики ихь халкьдин вакилар Урусатдин Федерацияйин Игитар духьна. Дугъри юкIв айи сар инсандихьанра вижнасузди дурарихьинди лигуз даршул. Гизаф йисариси, гьамусра кIару шаликк чпин дерд жин дапIну, дадйири чпин баяр Ватан уьбхюз гьаъра. Мициб халкьдиз гьарган ужуб гележег ади шулу. Сувайнат Кюребеговайи чан шиърариъ гьаму культура, гьаму халкьдин гьиссар атIагура.
Вари халкьдин, ихь баярин ва шубарин терефнаан, Сувайнат Кюребегова кIулиъ ади, литература улихь гъахурайи шаирариз, писателариз, тарихчйириз, илимдин вакилариз халкьдин сурат, культура, аьдатар аьсрариз гъахурайивализ дилигну, чухсагъул пуз ккундузуз», – гъапнийи чан улхбаъ Алавудин Мирзабалаевди.
Дугъан улхбан кьяляхъ Каспийск шагьрин 15-пи нумрайин мектебдин мялим Сейранат Аьбдуллаевайи «Дербентдиъ дадайиз вуйи ядигарихъ» шиир гъурхнийи.
Серенжемдиъ удучIвну гъулху «Табасарандин нурар» газатдин кIулин редактор Гюлягьмад Маллялиевди, Сувайнат Кюребеговайин яратмишарин рякъкан, дугъан эсерарикан вуйи чан фикрар ачухъ апIури доклад гъурхнийи.
Шаирин яратмишарикан, дугъан хъуркьуваларикан ктибтури, экономикайин илмарин доктор Зейдулла Юзбеговди, тарихи илмарин доктор, Варихалкьарин заан мектебдин академияйин академик Мягьямед Гьясанов ва хъана жарадар удучIвну гъулхнийи.
Серенжемдиъ Табасаран райондин ТIюрягъ гъулан халкьдин культурайин центрин заведующий Сураят Гьяжикеримовайи ва Дагъустандин халкьдин лайикьлу артистари юбилярин гафариз дидикIнайи мяълийир гъапIнийи.
Гизаф йисари Сувайнат Кюребегова редакторди лихурайи табасаран чIалниинди удубчIвурайи «Дагъустандин дишагьли» журналин кIулин редактор Хамис Шамиловайи, республикайин «Ппази» ва «Литературайин Дагъустан» литературайин журналарин кIулин редактор Мурад Аьгьмедовди, табасаран чIалниинди удубчIвурайи «Ппази» журналин редактор Феруза Султановайи, ногъаярин шаир Бике Кулунчаковайи ва жарадари Дагъустандин лайикьлу шаир Сувайнат Кюребегова ужур шаирси, «Халкьдин шаир» ччвурназ лайикь кас, дугъри гъарашугъ, гьарсаб вахтна кюмекнан хил гьачIабккуз гьязур вуйи инсан вуйиваликан гъапнийи.
Шаирин юбилейиз бахш вуйи серенжемдиъ Каспийск шагьрин мектебдиъ урхурайи шубари шиърар гъурхнийи.
Шадлугънан мярака сягьнайиина удучIву табасаран шаирари ккудубкIнийи. Дурари гьарсари Сувайнат Кюребегова тебрик апIури, шиърар гъурхнийи.
