Зубайдат Шябанова
Гьаму йигъари Москва шагьриъ коммерцияйин дару тешкилатарин (НКО) кIулиъ айи дишагьлийирин вари Урусатдин сабпи форум гъабхьну. Дидин дахилнаъди «НКО-йин дишагьлийир» ччвур тувнайи Сабпи милли пишекарвалин премияйин конкурс кIули гъубшну. Дидиъ ихь ватанагьли, Санкт-Петербургдин сакьатвал кайи бицIидариз ва сакьат бабариз кюмек тувру «Аревик» центрин идара апIурайи директор, «Санкт-Петербургдин инвалидвалин коляскйириъ айидарин бал» проектдин кIулиъ айи Эльвира Аслановара иштирак гъахьну.
«НКО-йин дишагьлийир» Сабпи милли пишекарвалин премияйин конкурс цци май вазлихъан мина гьяракатнаъ айиб ву. Конкурсдиъ саки вари Урусатдин регионарин коммерцияйин дару тешкилатарин кIулиъ айидар, кIакIначи гъуллугъчйир ва волонтерар — вари 505 дишагьли – иштирак гъахьну. Дурарикан Урусатдин 59 региондиан вуйи 174 иштиракчи полуфинализ удучIвну.
Конкурсдин иштиракчйир йицIуб асас ва ургуб аьлава номинацйириан талитариз удучIвнийи. Дурарин пишекарвализ кьимат тувру жюрийин дахилнаъ Госдумайин депутатар, Урусатдин Жямяаьтлугъ палатайин ва Московский областдин Жямяаьтлугъ палатайин вакилар, НКО-йин цирклин кIакIначи экспертар айи.
Финализ удучIву Эльвира Асланова къайд дапIнайи конкурсдиъ гъалиб гъахьну. Форумдин кьяляхъ учу дугахъди сюгьбат гъубхунча.
«Конкурсдиъ иштирак хьпан метлеб – узу Санкт-Петербург шагьриъ кIули гъабхурайи «Инвалидвалин коляскйириъ айидарин бал» серенжемдикан мялуматар тарагъуб вуйиз. Думу бал маиф, яна ликри лицуз даршлу, ДЦП ва сагъ апIуз даршлу жара уьзрар кайи бицIидарихъди ва дурарин абйир-бабарихъди гьар йисан гъабхури, магьа урчIвубпи йис ву. Гъюру йис Санкт-Петербургдин инвалидвалин коляскйириъ айидариз тешкил апIру мяракайин 10-йисандин юбилей хьибди. ИкибаштIан, учу дидин дережа шлубкьан яркьу апIурача ва ич метлеб – му балихьна жара регионарра жалб апIуб вуйич.
Конкурсдиз узу кIули гъабхурайи ляхникан ва ич тешкилатдикан швнуб-саб проект гьязур гъапIунза. Дурар кьюб номинацияйиз тувунза. «НКО-йиъ йиз рякъ» номинацияйиъ узу маиф бицIидарин центриъ 2011-пи йисхъан мина гъабхурайи ляхникан ктибтнийза ва натижайиъ сабпи йишв гъадабгъунза. Хъа «Культура ва искусство» номинацияйиъ ич проектдиз – учу коляскйириъ айи сакьатвал кайи бицIидарин ва жигьиларин бал Санкт-Петербургдин культурайин серенжемси адабгъунча – кьюбпи йишв тувну. Думу проектдихъди жюри таниш апIури, Кафари меркездиъ яшамиш шулайи маиф бицIидарин уьмрикан, дурариз ва дурарин абйир-бабариз алахьурайи читинваларикан, культурайин серенжемари, хъа асас вуди дурар чпи иштирак шулайи ялхъвнарин мяракайи дурариз туврайи гьевеснакан ктибтунза. Гьяйифки, коляскйириъ айи бицIидарихьан, ухьуз мялум вуйиганси, гьар йигъандин уьмрин серенжемариъ аьдати бицIидарихьанси иштирак хьуз шулдар. Себебарикан ва бязи инсанарин янашмиш’валикан узу затра улхурадарза. Ихь жямяаьтлугъ, гьяйифки, гьаму гъатнан бицIидар багахьди кьабул апIуз гьаммишан гьязурдира шулдар. Хъа учу гьацдар бицIидар саб йишв’ина уч апIури, дурариз аьхю машквар тешкил апIурача. Думу сад йигъандин ляхин дар. Ялхъвнарин бал хьайиз кьюб-шубуб ваз улихьна думу бицIидарихъди репетицйир гъахури шулча. ИкибаштIан, гьарсар бицIириз учу жа-жаради ялхъвнин палат гъадабгъурача, дурарихъди кIулин кушар къайдайиз хру ва жара пишекрари ляхин апIуру. Йисан саб ражари дурар сюгьрин махъвнан иштиракчйир шула.
Ццийин серенжемдиъ 200-тIан артухъ бицIидар хьиди. Думу 17-пи сентябриъ кIули гъябгъиди. Гьяйифки, шагьрин улихь хьайидарин терефнаан му мяракайиз жара апIурайи пулин кьадар лап бицIиб ву, гьаддиз учу спонсорар жалб апIуз мумкинвалар агурача. Иштирак хьуз ккунидарин кьадар аьхюб ву. Вари бицIидарихъди ляхин апIуз, гьяйифки, мумкинвал шуладарчуз. Гьаци вушра, гъюру йисан юбилейин серенжемариз учу иштирак хьуз аьшкь айи вари маиф бицIидар кьабул апIурча ва жара регионариан вуйи хяларизра ккилигурача. Москвайиъ гъабхьи Урусатдин конкурсдин кьяляхъ шубуб региондин вакилари чпи балиъ иштирак хьуз гъюруваликан мялумат тувунчуз», – гъапну ич сюгьбатнаъ Эльвира Аслановайи.
Дюзди кIурза, коляскйириъ айи кьюр-шубур бицIирихъди сатIиди ляхин апIуз хайлин читинвалар алахьуру, хъа 200 бицIирихъди лихували фукьан зегьмет тIалаб апIураш, узхьан фикризкьан гъадабгъуз шуладарзухьан. Гъит, ихь шуран кIваъ айи мурадар вари тамам ишри. Дугъу, дугъриданра, эдеблувалин баркаллу ва рягьимлу ляхин кIули гъабхура. Маиф бицIидариз махъв багъиш апIуб анжагъ марцци юкIв айи инсандихьантIан удукьру ляхин дар.
