Зубайдат Шябанова
Октябрин аьхиримжи йигъари Табасаран райондиъ Хючна гъулан 1-пи нумрайин лицейдиъ математика дарс кивру мялимарин республикайин слет кIули гъубшнийи. Асас улхбар Дагъустан республикайиъ математикайин аьгъюваларин ва мянфяаьтлу практикйирин темайиз бахш гъапIнийи.
Серенжемдиъ республикайин мялимарин Ассоциацияйин вакилар, республикайин 15 райондиан математикайин варитIан ужударстар 100-дихьна мялимар иштирак гъахьну.
Серенжемдин иштиракчйир теб-рик апIури, Табасаран райондин глава Мягьямед Къурбанов удучIвну гъулхнийи.
«Гьаму мяналу серенжем Табасаран райондиъ гъабхурайивалиин учу лап шад вуча. Дюзди гъапиш, ич район гьаци аьгъдарди гъядябгъюб дайи. Табасаран райондиан вуйи аьхю пай студентарин математикайин илмариан ужудар хъуркьувалар а.
Райондин артмиш’вал гележегдиъ ужуб ерийин образованиейихъди аьлакьалу апIураза. Гьаддиз учу райондин мектебарин шараитар мюгькам апIуз, материалинна техникайин бина цIийи алапIуз ва гьацира гьар йисан математикайиан олимпиада гъабхуз чалишмиш шулача. Думу олимпиадайин гъалибчйир шубуд йигъаз Москвайиз экскурсияйиз гьаърача. Гъийин слетдиз республикайин ужударстар мялимар уч духьна. Учвхьан гъадабгъу тажруба гьавайиди гъюдюдубчIврувалиин ва райондин мектебариъ урхурайидари ОГЭ ва ЕГЭ ужудар натижйир ади туврувалиин умудлу хьуз ккундузуз», – гъапну Мягьямед Къурбановди.
РД-йин мялимарин Ассоциа-цияйин кIулиъ айи Анжела Байрамбеговайи чан улхбаъ мектебариъ математика дарсар кивруган алахьру читинваларикан ва дурар гьял апIру рякъярикан ктибтнийи.
«Гъи ихь республикайиъ математикайин дарсар ужуб дережайиъди кивбан месэла ва думу предметдин мялимар гьуркIри адрувалин читинвалар арайиз дуфна. Ихь улихь мектебариъ математика дарс кивбан къайда заан ерийиз хпан месэла дийибгъна», – гъапну дугъу.
Мягьямед Къурбановдин улихь Байрамбеговайи райондин мектебариъ физика, информатика, химия ва биология предметариан аьгъювалар гужал апIуз инженервалин классар арццбан теклиф дивну. Думу теклиф райондин главайиз кьабул гъабхьну ва дугъу му теклифнан зиин фикир апIуз гаф тувну.
Серенжемдиъ чпин фикрар ачухъ апIуз мялимаризра мумкинвал тувнийи. Хъасин слетдин ляхин хьуб секцияйиз пай гъапIну. Душвариъ тажрубалу мялимари математикайин жюрбежюр темйириан дарсар, мастер-классар, тренингар гъухну, урхурайидар ОГЭ-йихьна ва ЕГЭ-йихьна гьязур апIбан методикйирикан ктибтну.
Серенжемдин кьяляхъ слетдиъ иштирак гъахьи Хив райондин Мажвгул гъулан мектебдиъ математика дарс киврайи мялим Эльбрус Багъдаевдихъди сюгьбат гъубхнийза.
«Дюзди кIурза, узуз серенжем гизаф кьабул гъабхьунзуз. Бажаранлу мялимарин тажруба гъи ухьу шлубкьан гъадабгъну ккунду. Хив район улихьдихъанмина математикайин бажаранлу мялимариинди ва думу цирклиан ужудар аьгъювалар айи студентариинди адлу вуйи. Гъи математика предмет кивру мялимар Дагъустандин гизаф мектебариъ гьуркIрадар. Му республикайин образованиейин министерствойин улихь дийибгънайи учIру месэлйирикан саб ву. Хъа мектебариъ лихурайи мялимариз гьаму жюрейин серенжемар, иллагьки гъи, лапра важиблу ву. Университетдиъ гъадагъу аьгъювалар тажрубалу мялимарин практикайин дарсарихь тевуз гьичра даршул. Мисалназ, узуз йиз предметдиан вари аьгъювалар азуз. Хъа ич секцияйиъ бицIидариз дарс дубгъуз, думу дурарихьна рягьятди рубкьуз, гьииди гъавриъ тIауз улупну. Узу шубубпи секцияйиъ айза. Секция математикайин мялимарин ассоциацияйин кIулиъ айи Салидат Караевайи гъубхнийи. Секцияйиъ ярашугъарин тажрубайихъди таниш хьпан кьяляхъ мялимари сар-сарихъди аьлакьйир уьрхюб йикьрар гъапIнийча», – гъапнийи Эльбрус Багъдаевди.
