Наргиз Гюлечова
Апрелин 24-диан 27-дизкьан Чехияйин меркез Прага шагьриъ аэробикайин гимнастикайин вари дюн’яйин халкьарин арайиъ вуйи «Czech Aerobic Open 2025» чемпионат кIули гъубшну. Думу чемпионатдиъ Алматайиъ яшамиш шулайи 7 йисандин яшарин ихь ватанагьли Ясмин Мягьямадова иштирак гъахьну.
Ясмин Мягьямадова, бабкан гъахьихъанмина чан абйир-бабарихъди Казахстандин Астана шагьриъ яшамиш шула. Жилар гъутIурччвган, Хив райондин ЧIвалакк гъул’ан Рубасдиз удучIвну гъафи дурарин хизандиз хъасин Казахстандиз кючмиш хьуб алабхънийи. Аэробикайиин машгъул духьну шуран кьюд йистIан артухъ ву, дугъу тренер Диана Жакишевайин хиликкди Астанайин аэробикайин мектебдиъ агъювалар гъадагъура.
Спортдиин машгъул духьну гизаф йисар даршра, Ясминдин дидихъ яманди юкIв хъайиб дугъу улупурайи натижйири тасдикь апIура. Зиихъ къайд дапIнайи вари дюн’яйин халкьарин арайиъ вуйи чемпионатдиъ иштирак духьну, сарди удучIвну улупу аэробикайин гимнастикайиан думу 2-пи йишван сагьиб гъахьну, хъа жутди вуйибдиан, Муслим Аьбдукьадировдихъди чпин яшарин категорияйиан 1-пи йишв гъадабгъну, дурар чемпионар гъахьну.
