Зубайдат Шябанова

Гъубшу гьяфтайин аьхириъ Хючна гъулаъ Кьалухъ Мирзайин ччвурнахъ хъайи спортдин дараматдиъ волейболиан Дагъустандин Кубок бадали вуйи талитар кIули гъушну. Аьхиримжи ражари дурар кьад йис улихьна, 2002-пи йисан кIули гъухнийи. Ва сач Мягьямед Къурбанов талитар Табасаран райондиъ цIийикIултIан тешкил апIбан ва гьар йисан мушваъ гъахбан теклиф хьади удучIвнийи. Талитар давам гъапIхъанмина (2022-пи йис) Кубокдин сарпи сагьиб Хасавюрт райондин команда гъабхьнийи.

11-12-пи ноябриъ кIули гъушу ццийин талитариъ республикайин варитIан ужудар 6 команда иштирак гъахьну: Табасаран, Къизилюрт, Хасавюрт, Хунзах районарин, РД-йин жигьиларин сборный ва ДГУ-йин сборный командйир. Полуфинализ юкьуб команда
удучIвнийи. Табасаран ва Хасавюрт районарин командйирин дурумлу бягьснаъ табасаран команда 2:1 гьисаб ади магълуб гъабхьнийи. ДГУ-йин сборнаяра, Къизилюртдин командайиин гъалиб дубхьну, лайикьлуди финализ удубчIвнийи. Шубубпи йишв Къизилюрт райондин командайи гъазанмиш гъапIну.

Хъа финалиъ гъубшу йисандин Кубокдин сагьиб вуйи Хасавюрт райондин команда, нубатнан ражари чан заан устадвал тасдикь апIури, ДГУ-йин сборнаяйиин гъалиб гъабхьнийи.

Табасаран райондиз дуфнайи Дагъустан Республикайин волейболин Федерацияйин президент Мягьямед Гъайирбеговди къайд гъапIганси, 2024-пи йисхъанмина башламиш дапIну, му талитариз «Кьалухъ Мирзайин рюгьяриз бахш вуйи волейболиан
Дагъустандин Кубок» ччвур тувди.