Гюльнара Мягьямедова

Республикайиъ айи хабрариз интернетдиъ лигурайи вахтна, «Новости» РИА-йи тувнайи гьамциб макьалайиин алахъунзу: «Урусатди гъабхурайи хусуси метлеб айи операцияйиъ гъийиху эскрариз Дагъустандин Огни шагьриъ кивнайи «КIваинди уьрхбан багъдиъ» улихьнаси киву юкьуб гьар мялум дару касари улдушвну. Дидин гьякьнаан шагьрин администрацияйин мялуматарин гъуллугъну хабар тувну».

Мэрияйиъ къайд гъапIганси, тазади ибтнайи йимишарин багъ хусуси метлеб айи операцияйиъ иштирак гъахьидарин багахьлуйириз кIваз рягьят шуз гъюру йишв дубхьну ккунду. Душваъ хъана гьарар кивуб давам апIиди. Гьамциб мялумат гъябкъиган, дидин гьякьнаан йиз фикир дарпиди гьич гъибтуз гъабхьундарзухьан. Ихь арайиъ айи бязи ватандашар гьапIузвуш табиаьтдиз, гьюкуматдин, ясана жара эйсийин хусуси мутмуйиз зарар тувуз гьязурди шулу. Жара жвуваз зарар тувруган, дурарин кIулиъ фициб фикир ади шуйкIан? Дицисдар дюшюшар вари йишвариъ кми-кмиди алахьури шулу. Зарар тувуз ккунидарин я инсанарихьна, я табиаьтдихьна, ясана гьяйванатарихьна гьюрматнан, жавабдарвал адар. Дурарихьна абйир-бабарин терефнаан тербия кьитдитIан гъурубкьундар.

Гьюрмат фу вуш, аьдат фициб вуш, аьхюдарихъан дудубгъну ккунду. Хъа гьамусдин гизаф жигьилариз чпи варитIан фикирлудар вуйибси гьебгъру. Гьаму улихьнаси кивнайи бицIи гъелемари шлиз зарар туврайкIан?

«Гьюрматнан багъ» Ватандин маракьар уьрхюз душну, чпин жанар фида гъапIдарин гьюрмат уьбхюрайивалин саб лишан ву. Гьюкуматди дурарин гьюрмат уьбхюра. Гъи ихь гьарсаб гъулаъ, гьарсаб шагьриъ чпин гъийиху баярихъан, жиларихъан дерд зигурайидарин кьадар аьхюб ву. Зараркрариз, гъийиху эскрарин дадйирин, хупарин, бицIи веледарин гъянаъ фукьан аьхю, сагъ даршлу зиян аш, хабар адайкIан? Йиз фикриан, думу ляхин гъапIдар яшарикк ккуркьанайидар дар, бегьем яш дубхьнайи инсандихьан думу ляхин апIуз удукьур дупну, фикриз гъюрдар. Дицисдар касарихъди хизандира, жямяаьтлугъдира, гьюкуматдира, мектебариъ айи мялимарира сатIиди тербия тувбан ляхин дубхну ккунду.