Умгьанат Сулейманова

 
Яракьлу гьяракатариъ зийнар гъахьи эскрари дявдин медицинайин духтрарикан аьхю гьюрматниинди ктибтури, дурарин хилар тIилисим кайидар ву кIури шулу. Дугъриданра, военный духтрар ислягь вахтнара, дявдин гьяракатариъра, чпин уьмрикан фикир дарапIди, эскрарин сагъвал уьбхбахъ шулу.

Гъийин йиз макьалайин игит Табасаран райондин агьали жигьил духтир, хируг Аьлиев Айдин Аьгьмадович (шиклиъ) ву. Айдин, Петропавловск Камчаткский шагьриъ кьушмарин аьзарханайиъ хиругди лихура. Думу 1997-пи йисан ТIаттил гъулаъ мялимарин хизандиъ бабкан гъахьну. Адаш Аьгьмад физкультурайин мялим ву, дада Угълангерек – логопед.

 
Дупну ккундуки, 2015-пи йисан Табасаран райондиъ урус чIалнаан варитIан заан – 93 – балл гъазанмиш гъапIур анжагъ сар Айдин вуйи. Шубуб предметдиин ЕГЭ-йиан 244 балл гъадагъну, думу Санкт-Петербург шагьриъ С.М. Кировдин ччвурнахъ хъайи Дявдинна медицинайин академияйик урхуз кучIвнийи. Айдинди сабпи курснаъ старостайин ляхин гъабхури, заан кьиматариз урхурира гъахьну. Думу гьацира чав урхурайи академияйин тереф уьбхюри, Санкт-Петербургдиъ кIули гъушу спортдин хилариинди кчIихбаан чемпионатариъ ва вари дюн’яйин армияйин спортдин дявдинна медицинайин эстафетайин талитариъ иштирак шули гъахьну. Талитариъ Урусатдин сатIи вуйи командайи сабпи йишв гъадабгъну. Айдиндиз му спортдин вари аьгъювалар тувур дугъан адаш Аьгьмад ву. 2021-пи йисан чан урхурайиб ккудубкIну, Айдин ординатурайиъ урхуз учIвру. Думу ккудубкIбан кьяляхъ 2023-пи йисан жигьил пишекар Петропавловск Камчатский шагьриъ ерлемиш дубхьнайи кьушмарин аьзарханайиз лор-хирургди гьаъру.
Айдин учв лихурайи кьушмарин аьзарханайиъ ужур, гьюрмат айи лор-хируг ву. 2026-пи йисан 18-пи июнди Айдиндиз «капитан» ччвурра тувну.

 
Духтирвалин пишейихъ Айдин бицIидихъанмина юкIв хъайир вуйи. Дугъан аьхю аба Тажутдин Аьлиев Буйнакск шагьриъ медицинский училище ккудубкIну, сифте Гъуярик, хъасин НичIрас гъулариъ сад-кьюд йисан фельдшерди, хъасин Табасаран райондин ЦРБ-йиъ санитарвалина эпидемиологияйин гъуллугънаъ 40 йисан гъилихну. Гъи аьхю абайин рякъ чан худлари давам апIура. Аьгьмад ва Угълангерек Аьлиеварин хизандиъ юкьур духтир ва сар фельдшер а, анжагъ аьхюну риш Зарема мялим ву. Айдин лор-хирург ву, бицIину чи Камилайи Мягьячгъалайиъ медицинский универсететдиъ 5-пи курснаъ урхура, бицIину чве Ибрагьимди Петропавловск Камчатский шагьриъ медицинский училищейиъ фельдшервалин факультетдиъ урхура. Айдиндин хпир Диана кьушмарин аьзарханайиъ неврологди лихура.

 
Гьяйифки, Айдиндихъди узхьан телефондиан аьлакьайиз удучIвуз гъабхьундарзухьан. Хъа дугъкан вуйи му жикъи мялумат, дугъан дада Угълангерекди тувну. «Улихь хьайи аьхюр гьаммишан варидариз нумуна духьну ккунду. Ва йиз аьхюну бай Айдин сифтена-сифте абйир-бабариз, мектебдин мялимариз, гъулан жямяаьтдиз гьюрмат айир вуйиз. Аьхиримжи юкьуд -хьуд йис ихь халкьдиз гизаф гъагъидар гъахьну. Сифте – коронавирусдин тIягъюн, хъасин Украинайиъ гъягъюрайи дявдин гьяракатар. Коронавирус айи вахтна Айдинди 6-пи курснаъ урхурайи. Уьзур вари уьлкейиъ гъизгъинди тарабгънайи вахтна Айдин Москва шагьриъ дявдин госпиталин уьру зонайиъ вазариинди лихури гъахьну. Гъи магьа дугъу Украинайиъ гъябгъюрайи спецоперацияйиъ гъагъи зийнар гъахьи эскрариз мидицинайин кюмек тувра», – ктибтнийи дамагъ кади Угълангерек Аьлиевайи чан баликан.