Наргиз Гюлечова

Гьаму йисандин ккудубшу 6 вазлин арайиъ Дагъустандиз 860 агъзур туристар гъафну. Мидин гьякьнаан мялуматар республикайин туризмдинна халкьдин сяняаьткарваларин министр Эмин Мердановди тувну.

 

Дугъан гафариинди, ккудубшу йисандин сабпи гьацIахъди ццийин 6 ваз тевиган, сачтIан цци республикайиз гъюрайи хяларин кьадар 8% за дубхьна.
«Цци Дагъустандиз гъюрайи туристарин варитIан асас маршрутар Дербентдин фонтан, гими-экраноплан «Лунь», Нарин-гъала, Сулакдин дараскьал гъяр, Хянгъарин рибчрар ва Ургур чвуччвунна сар чучун гъала, Самурин яркур, гъумран дагъ «Сарыкум» ва хъанара жара объектар ву. Гьарсаб йишвахьна читинвалар адарди гъягъру рякъярра дапIну гьязурди а, вари йишвар хатIасузвал уьбхбахъди тяминра дапIна», – гъапну министри.

Рябгъюрайиганси, йислан-йисаз республикайиъ туризм гьяракатниинди артмиш шула. Гьаддихъди сабси къанундиинди, янаки чпи гъадабгъурайи гъазанждикан бюджетдиз налог туври лихурайи туристический объектарин кьадарра артухъ шула.
Федералин налоговый гъуллугънан Дагъустандин управлениейин кIулиъ айи Айдар Байрамовди туву мялуматариинди, налогар уч апIру идарйирин гьисабназ гъадагъу туриствалин объектарин кьадар сачтIан цци 37% артухъ гъабхьну.

«Гьамусяаьт региондин ругариин налогарин гьисабназ гъадагъну, къанундиинди ляхин апIурайи 17 санаторий, 164 хялар кьабул апIру хулар, 103 турбаза ва 366 гостиница а. 1-пи майдиз вуйи улупбариинди, туризмдин цирклиъ къанундиинди ляхин апIури, гъюрайи хяларихьна вахтназди вуди гъузру йишвар туврайи касарихьан гъюрайи налогдин кьадар 48 миллионна 500 агъзур манат гъабхьну. Му сачдин гьадму вахтнатIан 13 миллион манатдин артухъ ву.
Гьацира къайд дапIну ккундуки, аьхиримжи вахтари кассайин гюзчивал гъабхру техникйирин улупбариинди, туврайи чекарин кьадарра артухъ дубхьна», – гъапну УФНС-дин Дагъустандин управлениейин кIулиъ айири.