УчIру месэлйир гъитIирккура
Гюльнара Мягьямедова
25-пи ноябри Дагъустандин Глава Федор Щукинди прямой эфириъ республикайин агьалйирин суалариз жавабар тувди.
Къайд апIуб лазим вуки, улихьнара республикайин кIулиъ гъахьидари думу тажруба ишлетмиш апIуйи. Агьалйирихъди чIиви аьлакьа дебккуб гьюкмин кIулиъ айидарин ляхнин ачухъвалси, агьалйирин учIру месэлйир фикир дарди гъидритрувалси, дурарин гьюкмихьна айи тIалабар аьгъю апIубра ву.
Ав, жиниб дар, республикайиъ гьял дарапIу месэлйир гизаф гъузна. Шагьрар-гъулариъ кми-кмиди аквар кутIушвувал, уч дубхьнайи хъархъвсар вахтниинди адагъувал, марцци штухъди агьалйир тямин апIувал, чиркин штар марцц апIувал… Мидлан савайи, бюджетдин цирклиъ лихурайи пишекрарин – мялимарин, духтрарин, культурайин ва илимдин гъуллугъчйирин – маважибар цIибтIан дар, фунуб жямяаьтлугъ серенжемдиъра гьадму месэла гъитIибккури шулу. Ккилигурхьа, гьамцдар ва жара суалариз Федор Щукинди фицдар жавабар тувруш.
Хъа узу республикайин бязи агьалйирихьан, дурари прямой эфириз фициб суалар хъатуз ккаш, гьерхунза.
Наргиз, Каспийск: – Ав, узура ихь главайиз суал хътапIунза. Йиз суалнаъ Каспийск шагьрин, Каспийская кючейин 4, 4а, 4б, 4в, 4г, 4д, 4е, 4ж хулариъ яшамиш шулайидарин тIалаб айиз. Гьаму хулариъ вари 840 квартира а. Учу мушваъ яшамиш шули 10 йис вуйич. Хуларин багарихь хьайи аьтрафар гьамусра къайдайиз духнадар. Натижайиъ, агьалйирин хатIасузвал, яшайишдин ери чIур дубхьна, гизафси яшлу касарин. Гъийин йигъаз ич бицIидариз азад вахт адапIру йишв, живанариз футбол апIру майдан адар. Гьаддин гьякьнаан хулариъ яшамиш шулайидарин терефнаан узу швнуб-саб ражари шагьрин администрацияйихьна, спортдин министерствойихьна депутатарихьна, гьацира гъубшу йисан главайин прямой эфир айиган, Сергей Меликовдизра суалра хътапIнийза. Эфириъ йиз суалназ жаваб тувундаршра, дидин кьяляхъ узуз жаваб гъафнийи. Амма гъира ич месэла гьял дубхьнадар. Ккун апIураза, дидиз фикир тувуб. Футболин майдан ккабалгуз багахь йишвра хьа, думу йишв чвлин ва кьюрдун мархьарин кьяляхъ шид дийибгъру дагриз илтIибкIуру. Эгер душвахь футболин майдан гъапIиш, марццишинра хьибди, ич бицIидариз тамшир апIру йишвра.
Гюльмира, Мягьячгъала: – Йизра главайиз хътапIуз суал гьязурди айиз. Учу яшамиш шулайи Мягьячгъалайин Турали райондиъ рякъяр лап читин гьялнаъ а. Юкьуд йис улихьна душваъ рякъ’ин асфальт улубзнийи, амма сад йис улдубчIвайизра асфальтдин рякъкан гъубзнайиб ичIар-гъумар ву. Мидланра савайи, гьадму рякъюъди ЦIийи Хушетдиз 12-пи а маршрутдин автобус гъябгъюру. ГвачIнин инсанар ляхниз, бицIидар мектебдиз, студентар дарсариз гъягъруган, автобусдиъ эуз шулдар. Думу Хушетдианмина кьикьнягъди абцIну гъюра. Маршрутдиъ лихурайи автобусарин кьадар артухъ апIуз мумкинвал адарин?
Сабсан тIалаб айиз, Туралийиъ бицIидариз тамшир апIуз, саб йишвахьна уч духьну вахт адапIуз йишв адар. Ич бицIи райондиъ айи бицIидар хъади Редукторный поселокдиъ айи паркдиз гъягъбакк ккубкьру. Амаевдин ччвурнахъ хъайи кючейиъ бицIидариз тамшир апIру майдан ккабалгуз шлу ужуб йишв а. Гьадму месэлара гьял гъабхьнийиш, гизаф шад хьидийча.
Гьюрматлу, Федор Вячес-лавович, гьаму месэлйириз фикир тувуб ккун апIурача.