Мейлан Нежефов

Мялум вуйиганси 1991-пи йисхъанмина 13-пи январи Урусатдин чап апIбарин йигъ къайд апIура. Хив райондиъ табасаран ва лезги чIалариинди гьяфтайиъ сабан удубчIвурайи чан хусуси газат ва гьар хябяхъган сяаьт 6-диан 9-диз райондин хабрар туврайи телевидениейин каналра а.

 

Машквран йигъан Хив райондин глава Ярмет Ярметов райондин пресс-центрин коллективдиз хялижв гъахьнийи.

«Гьюрматлу дустар! Учву улихь хьади, ихь чIалниинди чапдиан удучIвурайи махлукьатлу хабрарин дакьатарин вари редакцйириъ лихурайи гъарашугъариз пишекарвалин йигъ тебрик апIури, мюгькам сагъ’вал, хизандиъ шадвал ва ичв кьалмиккан ккудучIвру макьалйир хайирлудар хьуб ккун апIураза. Ав, гъи интернетдин замана дубхьнашра, хъугъай, ихь уьлкейиан, гьацира чIат айи баярикан вуйи хабрариз, дурарин суратар ва хъуркьуваларин мялуматар кайи газатарин, журналарин машариз райондин агьалйир тамарзуди ккилигура. Гьаддиз хъана ккун апIураза, учвхьан халкьдихьна рукьру макьалйир анжагъ шадвалиндар ва гьевесниинди урхрудар ишри», – гъапнийи райондин кIулиъ айири.