Зубайдат Шябанова
ЦIийи йис улубкьайиз улихьна Табасаран райондин глава Мягьямед Къурбановди хусуси метлеб айи дявдин операцияйиъ кечмиш гъахьи эскрарин хизанарихьна чпин веледарин Кьягьялвалин орденар тувну.
Гьюкуматдин наградйир тувру мажлиснаъ гъийиху эскрарин абйир-бабар, РД-йин Халкьдин Собраниейин депутат Алавудин Мирзабалаев, Табасаран райондин военный комиссарин заместитель Надир Шихягьмедов, Табасаран райондин депутатарин Собраниейин председатель Иса Исаев, райондин Жямяаьтлугъ палатайин кIулиъ айи Аьлимирза Гьяжиев, райондин главайин заместитель Ринат Мирзабалаев, гъийиху эскрарин гъуларин администрацйирин главйир иштирак гъахьну.
«Абйир, жилар, веледар талаф гъахьивалин хажалат сарихьанра ва сабдихьанра ккабгъуз шлу кьувват адар. Дугъриданна, ухьуз дурар гъалибвал гъадабгъбан кьяляхъ игитарси къаршуламиш апIуз ккундийхьуз, амма гьякьикьат жараб гъабхьну. Дурари варидари ухьу ва ихь бахтлу гележег бадали чпин уьмур сарф гъапIну. Ухьу дурар уьмурлуг кIваин уьрхюз ва дурарин хизанариз вари терефариан кюмекназ гъюз буржлу вухьа», – гъапнийи Табасаран райондин глава Мягьямед Къурбановди.
Надир Шихягьмедовди, ватандин маракьар уьрхюри, эскервалин буржи тамам апIурайи вахтна кечмиш гъахьи дирбаш ва игит эскрарин гьякьнаан Урусат Федерацияйин Президент Владимир Путиндин кьабул гъапIу къарар гъурхну. Дидик Хючна гъул’ан вуйи матрос Аьгьмад Амирялиевдиз, Вечрикк гъул’ан вуйи прапорщик Мягьямед Керимовдиз, ЖугътIил гъул’ан вуйи ефрейтор Рамин Мутелимовдиз, Рушвул гъул’ан вуйи ефрейтор Иса Гьяжимурадовдиз, Дарвагъ гъул’ан вуйи аьхюну сержант Рамиль Султанягьмедовдиз ва сержант Муртузяли Абасовдиз, ТIивак гъул’ан вуйи аьхюну матрос Аьрабхан Амираслановдиз Кьягьялвалин орденар тувбакан дибикIнайи.
«Му дерднаъ учву ялгъузди дарчва. Му ихь варидарин уьмуми дерд ва хажалат ву. Фуну вахтнара кечмиш гъахьи игитарин абйир-бабарихьан, хизанарихьан ва веледарихьан чпин дерди хьади муниципалитетарин кIулиъ айидарихьна, депутатарихьна, тешкилатарин ва карханйирин вакиларихьна, гьюкмин вари циркларин гъуллугъчйирихьна илтIикIуз шулу. Учвуз кюмек тувуз вари раккнар арццна», – гъапнийи чан нубатнаъ депутат Алавудин Мирзабалаевди.
