Наргиз Гюлечова
27-пи мартди Дагъустандиъ айи Федеральный антимонопольный гъуллугънан управлениейиъ (УФАС) ккудубшу йисандин натижйир йивбан пресс-конференция гъабхьну.
Уч духьнайи журналистарин улихь удучIвну гъулху УФАС-дин кIулиъ айи Каир Бабаевди мялум гъапIганси, ккудубшу йисан республикайиъ административ къанун чIур апIбаан 837 дело гъитIирккну.
Мидланра гъайри, контрактарин гъурулушдиъ къанун чIур апIбаан – 640 дело, шей’ар, алатар масу туврайи базрариъ антимонопольный къанун чIур апIбаан 133 дело гъитIирккну, гьял гъапIну.
«Улихь йисариз гъилигиган, 2023-пи йисан республикайиъ гъахьи къанун чIур апIуваларин кьадар 15%-кьан исди ву. Гьамдиинди, антимонопольный гъуллугъну ляхин ужуди тамам апIуз хъюгъну ва журумар мянфяаьтлуди ишлетмиш апIура, пуз шулу.
Мисал вуди гъадабгъиш, мутмйир, алатар масу туврайи базрариъ антимонопольный къанун чIур апIурайиваларин гьякьнаан УФАС-ди 101 дело гъухну. Думу делойир ахтармиш апIбиинди, 2018-пи йисан тикилишчивалиин ляхин апIурайидарикан Арбитражный суддин къарарниинди 40 миллион манатдин журум ктабгъну. Янаки, мектебар ва бицIидарин багъар тикмиш апIурайи «ПОН» ООО, «Дагстройсервис» ООО ва «Сейсмобезопастность» ГАУ РД – гьамрари гаф саб вуди ляхин апIурайибдикан УФАС-диз мялум гъабхну», – гъапну Каир Бабаевди.
Гьацира сач кми-кмиди республикайин муниципалитетариъ, хъа асас вуди Мягьячгъала ва Каспийск шагьрариъ аквар кутIушвбахъди ва агьалйириз туврайи электроэнергияйин ери лап исккан вуйивалихъди аьлакьалу вуди, УФАС-ди гизаф кьадар аьрз-йириз гъилигну. Натижайиъ 32 дело гъитIирккну ва 4 делойин гьякьнаан вахт ккимиди хабар тувну. Улупнайи кьадар делойир гъитIирккбиинди тахсиркрарин 26,4 миллион манатдин журум гъапIну. Гьаддикан 4,3 миллион манат тахсиркрарикан ктабгъну.
Чан улхуб давам апIури, Каир Бабаевди рекламайин гьякьнаан вуйи къанун чIур апIурайивалариканра гъапну. Дугъан гафариинди 2023-пи йисан РД-йин антимонопольный гъуллугънан управлениейиз, рекламайин гьякьнаан вуйи къанун чIур апIбакан хабар туври, 2 аьрза гъафну. Му аьрзйирин гьякьнаан чпин жягьтлувалиинди УФАС-ди ахтармишар гъахуз ва анализ апIуз хъюгъну ва 23 делойиз гъилигну. Гьадрарикан 18 дело рекламайин гьякьнаан вуйи къанун чIур апIбаан вуйи. Натижайиъ 6 предписанйир тувну. Гьадрарикан 5 предписание тувдари чпин хушниинди къайда чIур апIувалин нукьсанар арайиан адагъну.
Пуб лазим вуки, Дагъустандиъ варитIан гизаф рекламайин гьякьнаан къанун чIур апIурайиб рекламайик «сарпидар», «ужударсдар» ва гь.ж. гафар кайивал ву.
