Зубайдат Шябанова
Июндин 12-пи йигъан Табасаран райондин Хючна гъулан культурайин Хулан улихь Урусатдин йигъаз бахш вуди яркьу мярака кIули гъубшну. Думу серенжемдиъ Табасаран райондин глава Мягьямед Къурбанов, райондин идарйирин ва тешкилатарин вакилар, мектебариъ урхурайи баяр-шубар ва мялимар иштирак гъахьну.
Уч духьнайидариз Табасаран райондин депутатарин Собра-ниейин председатель Иса Исаевди Урусатдин йигъ машквран тарихдикан ктибтну.
«Июндин 12-пи йигъан уьлкейиъ гьюкуматдин машквар – Урусатдин йигъ къайд апIура. Му йигъ ихь халкьдин сабвал улупурайи лишан, ихь ватан дюзетмиш гъабхьи йигъ гьисаб ву. Му йигъахъди учву тебрик апIури, варидариз ислягьвал ва хушбахтвал ккун апIураза», – гъапнийи дугъу, уч духьнайидар къаршуламиш апIури.
Му йигъан машквран мажлисарин дахилнаъди райондин 5 живанди паспорт ар гъадагъну. Гьюкуматдин ватандаш’вал тасдикь апIру асас документ живанарин хилиъ райондин глава Мягьямед Къурбановди ивнийи.
Дугъу гьацира Мягьрягъ гъул’ан вуйи 3 велед хусуси метлеб айи операцияйиъ иштирак шулайи Мевлюд ва Лейли Жяфархановариз Чухсагъулин кагъзар тувну.
«Ичв веледар ихь райондин дамагъ ву. Учву дурариз фукьан ужуб ва мюгькам ватанпервер тербия тувнаш, варидариз рябкъюра. Дурарин бахтлу гележег бадали учву гъизигу кьадарсуз аьхю гъайгъушнарин учу гъавриъ ача», — къайд гъапIнийи, Жяфархановарихьна илтIи-кIури, райондин главайи.
М. Къурбановдин хил’ан Чухсагъулин кагъзар думу йигъан бицIи вахтназ хизанариин улукьуз отпускдиз дуфнайи СВО-йин эскрарира гъадагъну.
«Учву гьар йигъан ватандин маракьар, жямяаьтлугъдин хушбахтвал уьбхюри гъабхурайи женгарин учу вари шагьидар вуча. Ичв гъуллугъ хатIалуб, дявдин дарвалар айиб вушра, учву игитвалинди улихь дивнайи метлебар ва вазифйир намуслуди тамам апIурачва. Учу учвусдар игит, дирбаш, фидакар ватандашариинди дамагъ апIурача», — гъапнийи, эскрар къаршуламиш апIури, Мягьямед Къурбановди.
Серенжемдиъ гьацира райондин мектебариъ урхурайидари ватанпервервалин эсерар гъурхну ва концертдин бицIи программа улупну.
Мидланна гъайри, райондин культурайин Хулан фойейиъ, Урусатдин Йигъаз тялукь вуди, выставкара тешкил гъапIнийи.
