Зубайдат Шябанова

 
Гьаму йигъари Табасаран райондин живан волейболистари Дагъустандин пживанарин арайиъ вуйи талитариъ кьюбпи йишв гъазанмиш гъапIну.


Думу талитар ноябрин 15-пи йигъан Мягьячгъала шагьриъ яшар 14 йис хьайиз вуйи живанарин арайиъ кIули гъушну. Асас талитариъ 4 команда – Табасаран, Казбеков ва Дахадаев районарин ва Мягьячгъала шагьрин – иштирак гъахьну.
Табасаран райондин командайи сабпи талит Дахадаев райондин командайихъди гъубхну ва 2:0 гьисабниинди гъалиб гъабхьну. Хъа дурарин зиин кьюбпи талитнаъ Казбеков райондин командайихьан 0:2 гьисаб ади магълуб гъахьну. Кьюбпи йишв бадали вуйи талитариз Табасаран команда Мягьячгъалайин живанарин командайихъди талитназ удубчIвну ва гъалиб гъабхьну.

 
Талитарин натижйириинди, сабпи йишв Казбеков райондин, кьюбпи йишв Табасаран райондин ва шубубпи йишв Мягьячгъала шагьрин командйири гъазанмиш гъапIну. Дурар РД-йин волейболин федерацийияйин терефнаан кубокариинди, медалариинди, тялухъ грамотйириинди ва волейболин тупариинди лишанлу гъапIну.
Талитарин кьяляхъ узу ихь живанар тебрик гъапIунза ва республикайин волейболин чемпионатариз дурар гьязур апIурайи Табасаран райондин бицIидаринна живанарин волейболин 3-пи нумрайин мектебдин директор Садикь Уьсмановдихъди сюгьбат гъабхунза.

 
«Къайд апIуз ккундузуз, улихьнаси, яни октябрь вазлин эвелиъ, Табасаран райондин 2012-2013-пи йисари бабкан гъахьи живанарин команда республикайин талитариъ гъалиб гъахьну. Думу талитариз 7 команда дуфнайи. Ихь спортсменари варитIан заан йишв гъадабгъну.

 
Хъасин, октябрин кьялариъ, 2010-2011-пи йисари бабкан гъахьидарин арайиъ республикайин первенствойин талитар кIули гъушну. Думу талитариъ республикайин районариан ва шагьрариан 11 команда дуфнайи. Табасаран райондин командайи, вари уйнамишариъра талитариъ 2:0 гьисабниинди улихь гьудучIвну, сабпи йишв гъазанмиш гъапIну. Яни 18 йисаъ айи жигьиларин командйирин арайиъ республикайиъ варитIан улихь ихь райондин команда хьа. Дагъустан республикайиъ волейболиан варитIан ужур спортсмен Табасаран райондин сборный командайин вакил Аьли Ибрегьимов гьисаб гъапIну.
Магьа накьра, 15-пи ноябри, республикайин первенствойин талитариъ 2014-2015-пи йисари бабкан гъахьи живанарин арайиъ Табасаран райондин команда 2-пи йишван сагьиб гъахьну. Му командйир талитарихьна райондин спортдин 3-пи нумрайин волейболин мектебдин тренерари гьязур гъапIну. Аьхиримжи талитариъ иштирак гъахьи живанар кьюр АхьтIан, шубур Бухьнугъан, кьюр Хюрккан, ва са-сар Хянягъ, Ругуж ва Дагъни гъулариан ву. Гьаму живанар мициб жюрейин талитариъ сабпи ражари иштирак гъахьнийи. Волейбол уйнамиш апIури, дурарин кьюд йистIан дар. Чпин яшариз ва мумкинвалариз дилигну, дурарин гъийин хъуркьувалариин учу гизаф рази вуча. Гележегдиъ дурари хъана заан хъуркьувалар улупрувалиин умудлу вуча», – гъапнийи Садикь Уьсмановди.

 
Дугъан умударихъ узузра хъугъуз ккундузуз, фицики райондиъ бажаранлу тренерар айиган, хъуркьуваларра заандар шулу.