12-пи декабри ухьу уьлкейин тарихдин важиблу машкврарикан саб – Урусатдин Федерацияйин Конституцияйин йигъ къайд апIури шулхьа. 1993-пи йисан 12-пи декабри ихь уьлкейиъ цIийи Конституция кьабул апIбан гьякьнаан референдум кIули гъубшнийи. Думу референдумдиъ 58 миллионна 187 агъзурна 755 кас, яна гьисабназ гъадагънайи сечкичйирин 54,8 процент иштирак гъахьнийи. Думу кьадарнакан Конституция кьабул апIбахъанди 32 миллионна 937 агъзурна 630 сечкичийи сесер тувнийи. Гьадму йисан 25-пи декабри гьюкуматдин асас къанун кьувватнаъ убчIвнийи.

Конституция аьдати документ дар, думу Урусатдин халкьарин артмиш’валин бина ву. Диди ихь азадвал уьбхюра, къанундин улихь гьякьвал тямин апIура, гьарсар кас ихтиярариинди сар-сариз барабар вуйивал улупура. Ватандашариз Конституция аьгъяди ккунду, фицики къанунар аьгъяди хьуб, дурар тамам апIуб ужуди артмиш дубхьнайи уьлкейин лишан ву.
Асас къанунди гьюкуматдин Главади Урусатдин Федерацияйин Президент кьабул гъапIну ва дугъ’ин Урусатдин суверенитет, асиллу дарувал, уьлкейин сабвал, инсандин ва ватандашдин ихтиярарна азадвал уьбхбан вазифйир илитIну.
Урусатдин Федерацияйин Конституцияйиз ихь уьлкейин вари жилиин юрисдикцияйин заан кьувват а. РФ-диъ кьабул апIру къанунари ва ихтиярарин актари Конституцияйиз къаршувал улупну ккундар.

Дагъустандин Глава Сергей Меликовди республикайин агьалйир Урусатдин Федерацияйин Конституцияйин Йигъахъди тебрик гъапIну.
«Аьхиримжи йисари Урусатдиз хайлин читинвалар алахьну, хъа гьар ражари ватанпервервали ва халкьарин сабвали, багъри культурайихьна вуйи ккунивали, мюгькам хизандин аьдатар уьрхювали, бицIидариз ужуб тербия тувували, агьалйирин ватанпервервали думу читинвалариан удучIвуз кюмек тувра», – дупна республикайин Главайин тебрикнаъ.
«Табасарандин нурар» газатдин редакцияйин коллективди учву, гьюрматлу газат урхурайидар, Конституцияйин йигъахъди тебрик апIури, учвкан къанундихьна ва диди инсандиз туврайи ихтиярарихьна гьаммишан гьюрмат ади гъузуб ккун апIура.