Наргиз Гюлечова
Улихьна йигъари Дагъустан Республикайиз Узбекистандиан, Бухара областдин гьяким Батир Зарипов кIулиъ ади, аьхю делегация гъафну. Хялари, республикайиз дуфну имиди, туризмдин, гъулан мяишатдин, промышленностдин ва жара цирклариан сатIиди ляхин апIбан план дивну. Багарихьди думу план тасдикь апIиди.
Дуфнайи хяларихъди Дагъустандин Правительствойин председатель Аьбдулмуслим Аьбдулмуслимов ва республикайин министерствйиринна ведомствйирин вакилар гюрюшмиш гъахьнийи.
Дупну ккундуки, аьхиримжи кьюд йисандин арайиъ Узбекистандин ва Дагъустандин аьлакьйир лап мюгькам шула. Цци майдин вазли Урусатдин регионарин Советдин дахилнаъди кIулиъ гъушу серенжемариъ Узбекистан Республикайинна Дагъустандин правительствйири сатIиди ляхин апIбан йикьрар гъийитIну. Хъа сад йис улихь кIуруш, Аьбдулмуслим Аьбдулмуслимов, Дагъустандиан вуйи делегацияра хъади, Узбекистандиз гъушнийи ва душваъра жюрбежюр цирклариан сатIиди ляхин гъабхуз йикьрар гъийитIнийи.
Гюрюшдин эвелиъ Аьбдулмуслим Аьбдулмуслимовди гъапиганси, кьюб регионди экономикайин, алверин, илимдинна техникайин ва яшайишдинна культурайин цирклариан сатIиди ляхин апIувал – му дурарин стратегияйин партнервалин мяналу лишан ву. Батир Запировди, Аьбдулмуслимовдин гафариз кьувват туври, Узбекистандина Урусатди сатIиди апIурайи ляхнарин швнуб-саб план кьабул дапIнайиваликан гъапну. Кьюб уьлкейин арайиъ дюзмиш духьнайи алверчивалинна экономикайин терефнаан вуйи аьлакьйир гьамусдихъантина жара терефарианра хъанара яркьу апIиди.
Гюрюшдиъ гьацира Дагъустандиъ «Узбекистан» алверчивалин хал ачмиш апIбан гьякьнаан гаф-чIал гъабхьну, фицики кьюб региондин арайиъ вуйи импортдин улупбар 50%-тIан артухъ за духьна.
«Дагъустан Республикайиъ 3 миллион агьалйир яшамиш шула. Гьар йисан мина гъюрайи туристарин кьадарра саки 2 миллиондихьна ву. Гьаддиз, ужуб ерийин хьайин ва бамбгин шей’ариз муштарйирра гизаф а. Эгер Дагъустандиъ гьамцдар шей’ар масу тувру хал ачмиш гъапIиш, гизаф муштарйир шлувалиин умудлу вуза», – гъапну Аьбдулмуслим Аьбдулмуслимовди.
РД-йин туризмдинна халкьдин сяняаьткарваларин министерствойин вакилари хялариз республикайиъ юрутмиш апIурайи Каспий гьюлин гъирагъдихъ диврайи кластерин проектдиканра ктибтну. Гъийин йигъаз думу проектдиъ иштирак хьуз 17 инвестори чпин разивал тувна, кьюрихъдисан йикьрар йитIна. Аьбдулмуслим Аьбдулмуслимовди Бухара областдиан дуфнайи делегацияйизра проектдиъ иштирак хьпан ва дурарин улихь «Бухара» ччвур али хялар кьабул апIру комплекс тикмиш апIбан теклиф дивну.
Мидланра гъайри, регионари гъулан мяишатдин терефнаанра дюгю, багъманчивал ва тIумутIчивал артмиш апIбаъ сатIиди ляхин апIуз йикьрар гъийитIну. Узбекистандин делегацияйин вакилари чпиз Дагъустандиан 10 агъзур кIул малар гъадагъузра ккунди айиваликан мялум гъапIну.
Гьаму йисан августдин ва сентябрин вазарин арайиъ Дагъустандиъ Урусатдинна Узбекистандин сатIи вуйи промышленный карханара – «Асадбек Гласс Файбер» – ачмиш апIиди. Гьамусяаьт думу дивбан тикилишчивалин ляхнар аьхирихъна гъюра. Дагъустандин терефнаан «Каспийский завод стекловолокна» ООО-йи му проектдиз 50 миллион, хъа Узбекистандиан вуйи инвесторари 47 миллион манат инвестицйир харж дапIна. «Му кьюрид терефари сатIиди ляхин апIбан сабпи проект ву», – гъапну Дагъустандин премьер-министри.
