Гюлягьмад Маллялиев

Хиларигъ укIу рангнан жилдарик Хянгъярин рибчрарин шикил кайи, «Шерик йихьай» ччвур тувнайи бицIи китаб дибисназа. Думу улихьна йигъари Мягьячгъалайин «Лотос» чапханайиъ адабтIу, табасаран шаир Рамазан Рамазановдин таза шиърарин гъварч ву.

 

Къужник гъулан агьали, уста-тикилишчи-шаир Рамазан Рамазановдин му йирхьубпи китаб ву. Поэзияйиин юкIв али ихь ватанагьлийириз гъийин йигъаз дугъу гъидикIу «Мюгьюббатдин жилгъа», «Езирдиан кагъаз», «Ватандикан вуйиз мяъли», «Багъри юрд» ва 2023-пи йисан, Украинайин миллетчйирихъди Донбассдин жилариин женгар гъахурайи ихь эскрариз, рягьятвалин дакьикьайиъ урхуз кIури, урус чIалниинди адабгъу «КIван дих» («Зов сердца») шиърарин китабар таниш ву.
Тазади удубчIвнайи китабдиъ шаири гъулан яшайишдикан, жюрбежюр хайир-шейрарикан, багъри юрднан уткан рякъбарикан, марцци аькьвлин ва умун хасиятнан гъуландарикан ва дустарикан, гирами дадайикан, ккуни дишагьлийикан хайлин уткан, мацци ва мани гьиссариъ ацIнайи, шиърарин цIарар тувна.

Ватанпервер автори чан китабдиъ табасаран халкьдин («Эбелцан») ва ихь аьхю уьлкейин машкврарин («ЦIийи йис», «8-пи Март», «Гъалибвалин йигъ», «4-пи ноябрь» ва ж.) дерин мянйир ккатIарццури, дурарихьна вуйи чан кIван рафтар улупура.
Гъунши уьлкейин жилариин гъягъюрайи гьядисйири шаирин кIваз аьхю тясир туврайиб «Душман дуфна гъапдихъна», «Эскрариз», Танкист» шиърариан рябкъюра. Вягьши душмнихъди инсафсуз женгнаъ учIвнайи игитарихьна илтIикIури, автори бикIура:
Гьарсаб гъулаъ ва гьар хулаъ
Учву кIваин уьрхюри а.
Убгура юкIв бабан гъянаъ,
Балхъан дюаь апIури а.
Рамазан Рамазановдин китабдин – ва авторин урхрударикан вуйи тIалабнан – асас мяна ужувлан ляхнариз шерик хьувалихьна, гьар йигъандин уьмриъ инсанвал, намус уьбхювалихьна, багъри юрдариз, абйир-бабариз, ужудар аьдатариз гьюрмат апIбахьна дих апIувал ву.