Гюльнара Мягьямедова
Шубуб диндин шагьриъ – аьхю мажлис
Дагъустандиъ Рамазандин ваз улубкьиган сатIиди ушв гьибтбан мажлисар – дурариз ифтар кIури аьдатнаъ абхъна – кIули гъахури, магьа 10 йис шула. Му баркаван аьдат республикайин главади Рамазан Аьбдулатипов айиган, ккебгънийи, ва дугъан кьяляхъ Дагъустандин кIулиъ гъахьидарира думу давам апIура. Йиз фикриан, му гизаф ужуб ляхин ву, гьаз гъапиш диди аьдати агьалйирра, гьюкмин кIулиъ айидарра сатIи апIура, динагьлийирин сабвал улупура. Советарин девриъ диндихьна вуйи рафтарарихъди тевруш, му ихь уьмриъ убчIвнайи цIийивал, гизаф кьиматлу ляхинси рябкъюразуз. Гьамдихъди сабси, яшайишдин игьтияж кайи, гизаф бицIидар айи хизанариз, хъа аьхиримжи йисари хусуси метлеб айи дявдин операцияйиъ гъийиху эскрарин кюлфетариз ушв гьибтуз дих апIували дурарихьди чпи жвуван читинваларихъди сарна сарди гъитну адрувал гьисс апIуз гъитра.
Сачра, ццира лап аьхю ифтарар Сергей Меликовдин ччвурнахъан кIули гъушну – гьам республикайиъ, гьам ихь ватанагьлийир яшамиш шулайи имбу регионариъра. Гьациб аьхю берекетнан мажлис 6-пи апрели Дербент шагьриъ гъабхьну. Душваъ 4500 столар дивну, 10 агъзур касдиз ушв гьибтуз шартIар гьязур гъапIнийи. Мажлисдиз Дербент шагьрин агьалйир, республикайин вари районариан делегацйир, республикайиз дуфнайи 9 уьлкейин посолар, аьдати хялар ва туристар, Дагъустандин кIулиъ айидар дуфнайи.
Гирами Кьур’андиан вуйи «Ужудар ляхнар апIбаъ сар-сарин улихь йихьай» аятдиан вуйи гафар дупну, мажлис Сергей Меликовди ачмиш гъапIнийи.
«Ислам ислягьвалин дин ву. Багахь хьайириз кюмек апIуб, рягьимлувал, инсан дюз рякъюъ тIауб, улдугдариз рякъ улупуб диндин биналу шартIар ву. Думу рякъюъ асас яракь жвуван аьдатар, культура, ихь абйир-бабари хъапIу дин-тIяаьт хъапIуб ву»,
– къайд гъапIнийи дугъу.
Йиз фикриан, Дербент шубуб дин хъаърудар албагну яшамиш шулайи шагьур вуйивализ дилигну, ифтар душваъ гъабхуз йикьрар адабгъували, шаксуз, республикайин халкьарин ва динагьлийирин аьлакьйир анжагъ ижми гъапIну. «Шубуб диндин шагьрин» саб кючейиъ мистра, хачперезарин килисара, армянарин храмра, жугьдарин синагогара ерлешмиш духьна. Думу ата-бабйири ухьуз гъиту багьалу ирс, жюрбежюр динар хъаърудар ва гьар жюре миллетар албагну яшамиш хьувалин чешне ву», – гъапнийи Сергей Меликовди ва гъубшу йисан июндин вазлиъ уьлкейин Президент Владимир Путинди учв Дагъустандиз дуфнайи вахтнаъ гъапи гафар кIваина гъахнийи: «Урусатдиъ дин хъапIрударин намуснаъ аьрхювал къанун чIур апIуб ву».
Ифтарин иштиракчйири, «Крокус Сити Холл» концертар гъахру залиъ гъийихдарин гьюрматра гъюбхнийи.
Сергей Меликовди чан улхбаъ Дагъустандин муфтиятдин ляхнизра тярифнан кьимат тувнийи.
«Муфтиятди ислам диндин кьиматлувал чIур апIрудариз, арайиъ гъизгъинвал ипрудариз аьксивал улупура. Учву динагьлийирихъди вуйи ичв дюъйириъ республикайиъ сабвал, ислягьвал, инсанарин юкIвариъ мяргьяматвал артухъ хьувал ккун апIрайиваликан аьгъязуз», – гъапнийи дугъу.
Республикайин кIулиъ айири Дербентдин хяларихъди ва агьалйирихъди сюгьбатар гъухнийи ва дурар улубкьурайи машкврахъди мубарак гъапIнийи.
Мажлисдиъ харижи уьлкйириан дуфнайи артистари нашидар гъурхнийи, тупут ипбиинди ифтариз дуфнайидарикан 7 касдиз бицIи гьяждиз путевкйир тувнийи – 6 путевка Сергей Меликовдин терефнаан, 1 – «Умра-гьяж» проектдин терефнаан.
Ифтариъ гьадму йигъари Дербентди кIули гъубшу Вариурусатдин гьяфизарин конкурсдин гъалибчйирра лишанлу гъапIнийи. Республикайин главайин теклифниинди ва Дагъустандин муфтиятдин кюмекниинди тешкил дапIнайи конкурсдин асас пешкеш – цIийи «Лада Гранта» машин – варитIан ужуди Кьур’ан гъубху Дагъустандин исламдин университетдин студент, Чечен Республикайин вакил Адам Чергизовдиз тувнийи.
Ушв гьибтбан серенжемдиз Сергей Меликовди Палестинайиан Дагъустандиз гьергну дуфнайидаризра теклиф дапIнайи. Палестинайиан вуйи сар дишагьлийи республикайин кIулиъ айириз, дугъу чпиз туврайи дикъатназ ва кIван манишназ лигну, чухсагъул мялум гъапIнийи. «Думу йиз гьунар дар, узу Дагъустандин халкьдин метлеб тамам апIурайир вуза. Гъи Гъазайиъ гъягъюрайи гьядисйириз кIвак хажалат ктарди лигурайидар Дагъустандиъ сар касра адар», – жаваб тувнийи Сергей Меликовди.
Ифтарин иштиракчйири думу тешкил гъапIдариз кIваантIан чухсагъул мялум апIурайи. Урусатдин жара регионариан вуйи туристари, командировкайиз дуфнайи пишекрари, динагьлийири дагъустанлуйирин кIван манишну, имшахвали, албагнайивали чпи тяжуб дапIнайиваликан, чпи цIийикIултIан республикайиз ва Дербентдиз хяларди гъюруваликан журналистариз ктибтурайи.
Мажлис фейерверкар деетувалиинди ва Дербентдин фонтан кабхьувалиинди аьхирихъна гъафнийи.
Сабсан ифтар – гирами йишваъ
7-пи апрели Сергей Меликовдин ччвурнахъан сабсан аьхю ифтар УнцIукул райондиъра тешкил гъапIну. Думу «Ахульго» комплексдиъ кIули гъубшну. КIваин апIуз ккундузуз, мушваъ сачра 1000-лан зина инсанар иштирак духьну, ифтар гъабхьнийи. Цци Кавказдин дявдин вахтари имам Шамили ва дугъан мюридари аьхю гьунарар улупу ва гъи динагьлийири пак йишвси гьисаб апIурайи дагъдиина ушв гьибтуз 5-агъзурихьна инсанар уч духьнайи, гьадму гьисабнаан республикайин гьюкмин органарин, Жямяаьтлугъ палатайин, жюрбежюр районарин вакилар, гизаф бицIидар айи хизанар, хусуси метлеб айи дявдин операцияйин иштиракчйир ва дурарин багахьлуйир.
СВО-йин иштиракчйири ва удучIвну гъулху имбу касари гьамцдар инсанар сатIи апIру мяракйирин важиблуваликан гъапнийи, фицики халкьдин сабвали улихь дивнайи фундар месэлйирра хъуркьувалиинди тамам апIуз рюгь капIру.
«Ахульго» дагъдиин гъубху ифтар Кьур’ан убхувалилан ккебгънийи. Мажлисдиъ нашидар гъурхнийи, гизаф бицIидар айи хизанариан вуйи дадйириз ва бицIидариз пешкешар тувнийи.
