Гюльнара Мягьямедова
Мягьячгъалайин мэр Юсуп Уьмавовди 19-пи июнди учв ляхниан удучIвурайиваликан хабар тувну. Думу 2023-пи йисан майдихъанмина 2025-пи йисан июндизкьан Мягьячгъала шагьрин мэрин гъуллугъниин гъахьну. Уьмавовди учв ляхниан удучIвбан себеб шагьриъ гъягъюрайи реформйирихъди аьлакьалу дапIна: 2025-пи йисан апрелихъанмина Дагъустандин меркез шагьрин айитI йишв шубуб райондиз пай дапIнайи шагьрин округди имдар. Мягьячгъалайин Ленинский, Кировский ва Советский районар административный йишварси гъитна, хъа самоуправлениейин ерли органарин ляхин дебккна. Дурарин ерина шагьрин администрацияйин жиларин подразделенйир арайиз хиди. Сентябрин вазли шагьрин собраниейиз депутатар ктагъбан сечкйир кIули гъягъиди. Гьадмуган Дагъустандин Главайи улупу кандидатарикан Мягьячгъалайин мэр тасдикь апIиди.
20-пи июнди Сергей Меликовди вахтназди Мягьячгъалайин мэрин вазифйир тамам апIрурди Жамбулат Салавов тяйин гъапIну.
«Инфраструктура цIийи алапIбан жигьатнаан шагьур тасдикь дапIнайи къайдайиинди артмиш даршули 30 йискьан ву. 1980-пи йисарин аьхирихъанмина Мягьячгъалайин артмиш’валин стратегия али йишвлан гъирибшвундар. Гьаддиз гъи рякъярин, машинар дерккру йишварин къайдасузвал, къанунсузди тикмиш дапIнайи гизаф мертебйирин хулар, агьалйирин коммунальный игьтияжар гьуркIуз кьувват бегьем адрувал ачухъди рябкъюрахьуз», – гъапну 23-пи июнди куIли гъубшу совещаниейиъ Дагъустандин Глава Сергей Меликовди. Дугъу совещаниейин иштиракчйир Мягьячгъалайин мэрин вазифйир тамам апIурайи Жамбулат Салавовдихъди таниш гъапIнийи.
Республикайин кIулиъ айири къайд гъапIганси, думу Жамбулат Салавовдихъди 2011-пи йисхъанмина танишди ву. Салавов Хасавюрт райондин главади лихурайи вахтна Сергей Меликов Кафари Кавказдиъ террориствализ аькси операцйир гъахру кьувватарин ва дакьатарин дестейин кIулиъ айир вуйи. «Дугъу чарасуз гьялнан къайда дебккнайи вахтна эскрарихъдира, агьалйирихъдира ляхин гъабхури, зийнар духьнайидариз кюмек туври гъахьну. Гъагъи шартIарин вахтна Жамбулат Шапиевичди аьгъяди ляхин гъубхнийи», – гъапнийи Сергей Меликовди.
Дидин кьяляхъ, транспортдин министрди лихурайи ва-хтна, Салавовди ужудар натижйир гъазанмиш гъапIнийи.
«ЙицIуд йисариинди гьял дапIну адру месэлйир гьял апIбан бадали, федеральный бюджетдиан пулин дакьатар гъадагъуз мумкинвал гъабгнийи. Гьял гъапIу месэлйирин арайиъ федеральный Р-217 трасса рас апIуб, Азербайжандихъди вуйи сяргьятарихьна машинар гъягъру рякъяр ккивуб, Хасавюрт, Мягьячгъала ва Дербент шагьрин гъирагъариан гъягъру рякъяр тикмиш апIбан месэла гьял апIуб айи», – давам гъапIнийи Дагъустандин Главайи.
Чаз гаф тувиган, Жамбулат Салавовди таза гъуллугънаъ жвуван улихь диврайи месэлйирикан гъапнийи. «Уз’ин аьхю хъугъ’вал алиб гьисс апIураза. Гьелбетда, агьалйирин, жямяаьтлугъ тешкилатарин тIалабарихъ хъпехъури, вари коллективди сатIиди ляхин апIидича. Ихь республикайин меркез бадали зегьмет зигидича», – гъапнийи дугъу.
Сергей Меликовди Мягьячгъалайин мэрди гъилиху Юсуп Уьмавовдиз, дугъу гизаф йисари зегьмет зигувал, республикайин улихь гъазанмиш гъапIу хъуркьувалар гьисабназ гъадагъну «Баркаллу зегьметназ лигну» медаль тувнийи.
Къайд апIуб лазим вуки, Мягьячгъалайин кIулиъ тяйин дапIнайи цIийи гъуллугъчийин улихь хайлин учIру месэлйир дийигъна: къанунсузди тикмиш дапIнайи хулар, зяиф инфраструктура, жиниди гъабхурайи бизнес, гьял дапIну ккудубкIну ккуни хъархъвсин месэла ва хайлин жарадар. Мурар хъюгъну вари сатIиди кIулиз адагъуз шлу ляхнар дар, хъа цIийиди кадагънайи гъуллугъчийи фунубдихъан хъюгъруш, план гьязур дапIнашул.
Жамбулат Салавовдиз цIийи ляхниъ заан хъуркьувалар ккун апIурахьа.
