Зубайдат Шябанова
Гьаму йисандин приемный кампания яваш-явашди аьхирихъна гъюра. РФ-дин образованиейин ва илимдин министерствойин сайтариъ приемный кампания ккебгъу сабпи йигъланмина гъийиз уьлкейин вузариз саки 7 миллиондихьна абитуриентари документар тувнайиваликан кIура. Му улупбар гьеле очный формайиинди аьгъювалар гъадагъбандартIан дар.
Вари уьлкейиъси, Табасаран ва Хив районарин мектебарин выпускникари гележегдиз вуйи пише ктабгъура. Сад-кьюд йис мидиз улихьна выпускникариз «фунуб пише ктабгъунва?» суал тувган, дурари: «ИТ-технологйирин пише», «юрист», «экономист» кIуйи. Цци аьгьвалат дигиш дубхьна пуз шулдарзухьан, хъа узу суалар туву табасаран жигьилари асас вуди медицинайин цирклиз артухъси фикир туврайи. Узу сюгьбат гъубху Марият Рашидова, Амина Мягьямедова ва ТIагьир Межидов Табасаран райондин гимназия уьру аттестатдиз ва гъизилин медализ, хъа Амина Шябанова Каспийск шагьрин А.Аьлиевдин ччвурнахъ хъайи медучилище ужудар аьгъювалариз ккудубкIу выпускникар ву.
Марият Рашидова:
– Узу гьеле 8-пи классдиъ урхури имиди юрист хьуз кьаст гъапIнийза. Гьаддиз ЕГЭ-йихьна бегьемди гьязур гъахьнийза. Натижайиъ обществознаниейиан 94, тарихдин дарснаан 96, урус чIалнаан 81 балл гъазанмиш гъапIунза.
Мектеб ккудубкIну аттестат гъадабгъубси, уьлкейин улихь хьайи 4 вуздиз – Москва шагьрин гьюкуматдин юридический академияйиз, Санкт-Петербургдин гьюкуматдин университетдиз, Саратов шагьрин гьюкуматдин университетдиз, гьадму шагьрин гьюкуматдин юридический академияйиз ва Мягьячгъала шагьрин правовой академияйиз – документар хътаунза.
Дюзди гъапиш, ич багахьлуйиригъ узуз мединститутдиз документар тув кIурударра айи. Хъа узуз жвув медицинайиъ рякъюрадарзуз. Гележегдиъ ватандаш’валин цирклиан вуйи ляхнариз лигру адвокат хьуз ккундузуз.
Амина Мягьямедова:
– Табасаран райондин гимназияйиъ урхуз гъагъиди гъабхьундарзуз. Мялимарира гьаммишан кюмек апIури, гъавриъ адрубдин гъавриъ тIаъри шуйи. ЕГЭ-йин натижйирра харжидар гъахьундариз: урус чIалнаан 89 балл, биологияйиан 77, химияйиан 82 балл гъазанмиш гъапIунза, хъа бинайин математикайиан 5 гъадабгъунза. Дюзди гъапиш, урхуз медицинайин цирклиз гъягъюз кьаст айиз. Документар Саратов, Ставрополь, Краснодар, Волгоград ва Санкт-Петербург шагьрариъ айи медуниверситетариз хъадаънача…
Духтирвал гьаммишан варитIан игьтияж айи пише вуйи. Гележегдиъра думу кесп айидариз вари йишвариъ ляхин шулу. Хъа узу ляхин бихъуру кIури ваъ, хъа мектебдиъ 8-пи классдианмина му пише гъадабгърувалиин инанмиш вуйза. Гьаз гъапиш узуз инсанариз кюмек апIрудар, дурар аьжаликкан ккадагърудар, рягьимлувалин хил гьачIабккрудар гизаф кьабулди вузуз.
Медицинайин цирклиъ фунур пишекар шулуш, гьеле пуз хьибдарзухьан, хъа неврологдин ляхнихьна артухъдиси юкIв зибгурайиз.
ТIагьир Межидов:
– Узу мектебдиъ ккергъбан классариан мина ужудар кьиматариз урхури гъахьунза. Хъа биологияйин ва химияйин дарсарихьна маракьлувал аьхюб гъабхьуйиз. Гьаци 5-пи классдианмина узу медицинайин циркил ктабгъунза. Гъи узу Саратов, Самара, Ростов, Иваново ва Краснодар шагьрарин медицинайин вузариз документар хъадаъназа. Имтигьнарин натижйир харжидар гъахьундариз: химияйиан 84 балл, урус чIалнаан 83 ва биологияйиан 68 балл гъадагъунза.
Пуз ккундузузки, йиз чве Эльдарира 2020-пи йисан Табасаран райондин гимназия гъизилин медализ ккудубкIнийи. Цци думу Саратовдин гьюкуматдин медицинайин институтдин 5-пи курсназ удучIвна. Узура чвуччвун шилнаъди гъягъюз ният гъапIунза.
Амина Шябанова:
– Узу Каспийск шагьрин 6-пи нумрайин мектеб ккудубкIбан кьяляхъ А.Аьлиевдин ччвурнахъ хъайи Каспийскдин медучилищейик урхуз кучIвунза. Цци диплом гъадабгъунза. Амма му цирклиъ урхувал давам апIуз ва духтир хьуз кьаст айиз. Узу Урусатдин Минздравдин Санкт-Петербург шагьрин И.Мечниковдин ччвурнахъ хъайи медуниверситетдиз кагъзар хътаунза. Гьадушваъ физиологияйиан, анатомияйиан ва урус чIалнаан имтигьнарра тувунза. Натижйир август вазли шулу, гъапунчуз. Думу институтдиз конкурс аьхюб ву.
Гъит ихь гьаму жигьиларин ва вари выпускникарин кIваъ айи кьастар кIулиз удучIври. Гележегдиъ дурар чпин пишейиъ заан аьлимар духьну, хайлин инсанариз кюмек туври лихиди кIури, умуд кивдихьа.
