Мейлан Нежефов
Хив райондин культурайин хулаъ райондин имамарин советдин председатель Шябан-гьяжи Сялигьовдин жягьтлувалиинди тешкил дапIнайи мажлис кIули гъубшнийи. Гъуларин имамарихъди ва меркездиан дуфнайи гьюрматлу хяларихъди мажлиснаъ мусурман чвйир-чйирихъди ккудубшу йисандин натижйир йивури ва гьамус цIийи месэлйир улихь хьайибдикан улхури, райондин глава Ярмет Ярметовра иштирак гъахьну.
Агьалйирин улихь удучIвну улхурайидари жигьилариз хатIа айи уьмрин саб жерге чиркин рякъярикан, йишвариин аргъаж шулайи наслар терроризмдин тясирнахьан уьрхбан гьякьнаан гъапну. АТК-йин ляхнин план тартиб дапIну, райондин аьтрафариин политикайинна агьалйирин саламатвал ва мушваъ яшайиш дабалгнайи табасаран ва лезги миллетарин арайиъ дуствалин аьлакьйир уьрхбаз, дурар мюгькам апIбаз, ва гьацира диндихъди аьлакьалу месэлйириз райондин администрацияйин гъуллугъчйири дикъатлу фикир тувра.
Дугъриданра, натижйир улупурайиганси, райондин аьтрафариин уьмуми гьякьикьат фикриз гъадабгъиш, аьгьвалат саламатуб ву.
Живанариз дюз ислам диндин усуларикан ва къайдйирикан яркьу мялуматар туврайи ва райондиъ кми-кмиди жюрбежюр серенжемар кIули гъахурайи гъуларин имамар, райондин «Инсан» фонднан ва «Ас-салам» газатдин гъарашугъар гьюрматнан кагъзариинди ва пешкешариинди лишанлу гъапIнийи. Мидланра савайи, агьалйирин арайиъ билетарра уйнамиш гъапIнийи. Умрайиз вуйи путёвка ЧIири гъулан имам Абубакр Нурмягьямедовдиз кьисмат гъабхьнийи.
Багъри гъулан мектебдин 9-пи класс ккудубкIу Абубакр 10-11-пи классарин аьгъювалар гъадагъуз Мажвглиина гъафнийи. Думу мектебдиъ урхури имидира харжибдихьан ужуб, кIарубдихьан лизиб жара апIуз аьгъю гьялал бай вуйи. Дурарин классдиз регьбервал узу тувнийза. Гьаддиз думу лап багахьди аьгъязуз.
Путёвка Абубакриз кьисмат хьувалиин кьадарсуз разиди, марцци ругариина ягъурлу рякъ ва хайирлу сяътар ккун апIури, узу дугъаз зенг гъапIнийза.
«Саб гъапиб, узуз гьамциб мюгьлетвал ккабхъну имиди, узуз илим туву вари мялимариз баракаллагь пуз ккундузуз. Гьарурихьан саб, сарихьан кьюб дудубгъну, гъи инсанвалин заан ччвурназ лайикьлу кас гъахьунзукан. Сабсан ражну аферин йиз мялимариз.
Кьюб гъапиб, узу райондиъси, ихь меркездиъ гъягъюрайи вари му жюрейин мажлисариъра жямяаьтлугъ серенжемариъра иштирак хьуз чалишмиш шулаза. Амма пешкеш сабпи ражари вуди удубчIвунзуз. Хъа чавра – Уьмрайиз. Шюкюр ибшри Аллагьдиз. Йиз шадвалин кьадар адар. МашАллагь.
Шубуб гъапиб, узу, жигьил адми вуза. Белки, узуз дина цIиб кьандиси гъягъюз хъана кьисмат шул. ИншАллагь. Гьаддиз му ражари уз’анди йиз адаш Агъабег гьауз ккунди айиз. Аьлгьямдулиллагь».
