Наргиз Гюлечова
17-пи декабриан 22-пи декабризкьан Москвайиъ джиу-джитсу спортдин жюрейиан ACB-лигайиан вари дюн’яйин чемпионат кIули гъубшну. Думу чемпионатдиз, 25 харажи уьлкйирианра кади, 4500-тIан артухъ спортсменар уч гъахьнийи.
Гьадму талитариъ Ставрополиъ яшамиш шулайи Табасаран райондин НичIрас гъулан агьалйир, чвйир – Залбек (20 йис) ва Юсуф (13 йис) Рустамовар заан пешкешнан йишвар гъадагъну.
Къайд апIуз ккундузузки, чемпионар, хусуси метлеб айи дявдин опрерацияйиъ чан жан туву Агъабег Рустамовдин веледар ву.
«2019-пи йисан, 9-пи класс ккудубкIбалан кьяляхъ жигьил Залбег Ставрополин саб колледждик кьялан пишекарвалин образование гъадабгъуз урхуз кучIвнийи. Думуган учу жара йишваъ яшамиш шулайча. Аьхюну бай урхуз кучIвубси, дугъкан чан адашди урхувалихъди сабси, спортдиинра машгъул хьуб ккун гъапIнийи ва, фуну спортдин жюре кадабгъурушра, сиягь тувнийи.
Аьхю шагьур ву. ИкибаштIан, спортдиин машгъул хьпан бадали, фуну жюрейин спорт гъядябгъюрушра мумкинвал айи. Залбег, грепплинг жюрейин спорт гъядябгъну, аьшкьниинди дид’ин машгъул гъахьну. Аьхюну бай Ставрополиз урхуз гъягъбан кьяляхъ, сарун учура — вари хизан — дина кюч гъахьунча. Залбегу, учвси, чан кьюбрид чвйирра спортдиин машгъул хьуз гъитну. Ставрополиз гъюбан кьяляхъ кьялану чве Мягьямед ва бицIину чве Юсуф, юкьяр дисбан спортдиин машгъул гъахьну. Хъа 2022-пи йисан хизандин кIул хусуси метлеб айи операцияйиъ кечмиш гъахьиган, сарун чаин алабхънайи жавабдарвалин гъавриъ ади, Залбегу Юсуфра грепплингдин спортдин секцияйиз хъади гъафну, ва гьаддихъанмина дурари кьюриддира Саро Царукяндин тренерваликкди му жюрейин спортдиан агъювалар гъадагъура. Сарун, Залбегси, Юсуфра аьшкьниинди грепплинг спортдиин машгъул гъахьну.
Пуз ккундузуз, спорт йиз веледарин юкIв али ляхинси, гъи уьмрин рякъра дубхьна», – кIура дурарин дада Заирайи.
Спортсменарин дадайи туву мялуматариинди, аьхюну бай Залбег Рустамов, чав джиу-джитсу спортдиин машгъул вушра Ставрополиъ бицIидаризси, аьхюдарризра грепплингдиан аьгъювалар туври, спортивный секцияйиъ тренерди лихура.
Гъийин йигъаз му кьюрид чвйир хайлин спортдин серенжемарин гъалибчйир ву. Гьаму йисандин арайиъ СКФО-йин чемпионатдиъра, первенствойиъра, грепплингдин ADCC ва джиу-джитсуйин ACB жюрйирианра ЮФО-йин чемпионатдиъра, Урусатдин ва Европайин чемпионатариъра гъалиб гъахьну. Хъа магьа гьаму йигъари джиу-джитсу АCB жюрейиан Юсуф, 1-пи йишв гъадабгъну, варидюн’яйин чемпион гъахьну. Хъа Залбег, му чемпионатдиъ грепплингдин «Ги» категорияйиан вуйи талитариъ 2-пи йишван ва «НоГи» категорияйиан 3-пи йишван сагьиб гъахьну.
