Наргиз Гюлечова
20-пи сентябриъ Буйнагъск райондиъ «2023-пи йисан Дагъустандиъ варитIан ужи изан апIрур» кIуру республикайин конкурс кIули гъубшну. Конкурсдиъ региондин муниципалитетариан 14 гъулан мяишатдин хутIлариъ изан апIрудар, комбайнйир хъаъру механизаторар ва хъанара жара касар иштирак гъахьну.
«Аьхиримжи йисари му конкурс кIули гъабхбиинди, гъулан мяишатдиъ жилихъди ляхин апIурайи пишекрарин, гьадму гьисабнаан механизаторарин зегьметнан ад за апIуз ва аргъаж шулайи наслар думу пишейихъди таниш апIуз кюмек тувра. Гьамусдихъантина дарарихьан республикайин гъулан мяишатдин колледжариъ урхурайи студентари тажруба гъадабгъиди кIури, умуд киврухьа», – гъапну РД-йин гъулан мяишатдин ва ипIру-убхъру сурсатарин министрин сарпи заместитель Шарип Шариповди.
Конкурсдин натижйириинди, сабпи йишван сагьиб Буйнагъск шагьриъ айи гъулан мяишатдин колледждиъ урхурайи Сайпуллагь Гьяжибегов гъахьну. Кьюбпи йишв, Бабаюрт райондин «Аьбдуллаев» кIуру КФХ-йин механизатор Ризван Аьбдуллаевди, хъа шубубпи йишвра Къарабудагъкент райондин «Мурад» кIуру СПК-йиан вуйи Садрутдин Мужаидов гъадабгъну.
Мидланра гъайри, республикайин «2023-пи йисан Дагъустандиъ варитIан ужи хутIил хъапIрур» конкурсдин дахилнаъди, ужуди комбайнйирихъ лихрударра гъядягъну.
ХутIлариан тахил уч апIбан натижйирин талитнаъ, 1-пи йишв Буйнагъск райондин «Гьяжимирзоева» КФХ-йин комбайнйихъ хъайи Аьбдуллагь Аьбдуразакьовди, кьюбпи йишв – Къарабудагъкент райондин «Кьакьашура» КФХ-йин механизатор Камал Алчагировди ва шубубпи йишв – Хасавюрт райондин «Османюрт» СПК-йин комбайнйихъ хъайи Ислам Закировди гъадабгъну.
Къайд апIуб лазим вуки, конкурдин варитIан жигьил иштиракчи Сергогъала райондин «Краснопартизанский» кIуру САоК-дин 26 йисандин яшнаъ айи механизатор, Чупан Гьяжиев вуйи. Дугъазра Россельхозбанкдихьан пулин пешкеш тувну.
Конкурсдин гъалибчйир Рес-публикайин гъулан мяишатдин ва ипIру-убхъру сурсатарин министерствойин терефнаан Гьюрматнан грамотйириинди, пулин дакьатариинди ва «Щелково Агрохим» АО-йин пешкешариинди лишанлу гъапIну.
