Зубайдат Шябанова
Гьаму йигъари Мягьячгъала шагьриъ Поэзияйин театриъ «Дагъустан мяълийиинди адлу гъапIдар» IV Республикайин театрарин фестиваль-конкурсдин натижйир гъивну. Му фестиваль-конкурс Рамазан Аьбдулатиповди учв глава вуйиган тяйин гъапIуб вуйи. Думу конкурсдиз республикайин театрари Дагъустан адлу гъапIу шаирарин эсерариан сягьнийир адагъуру. Фестиваль-конкурс республикайиъ гьарсаб кьюд йисак гъабхура.
Цци думу конкурс-фестиваль гъабхури юкьубпи раж ву. Душваъ гьаму йисан сабпи йишв жюрийи Дагъустандин жаквларин театрин «Хочбар» спектаклиз тувну. Кьюбпи йишван сагьибар сабишв’инди кьюб театр гъахьну: «Дагълариъ гъубзнайиз юкIв» сягьна улупу Поэзияйин театр ва Урус театрин «Дишагьлийирин жазара» спектакль. Шубубпи йишв Авар театрин «Сабо Меседо» спектаклиз тувну. Хъа варитIан заан пешкеш – конкурсдин Гран-при Табасаран драмтеатрин «Асият» спектакли гъадабгъну.
Дюзди гъапиш, «Дагъустан мяълийиинди адлу гъапIбар» фестиваль-конкурсдиъ Гран-при айиб дар. Ва гьаму йисан думу тувуз саринра фикриъ адайи. Амма табасаран театрин актерарин устадвал, режиссерин ляхин, декорацйирин хъабалгувал ва тянкьидвалин саб гаф пуз даршлубси, гъалатI кадарди сягьнайиина адабгъу спектаклиз думу тувбан къарарназ жюрийин вари вакилари чпин разивал улупну.
Натижйир ачухъ апIбан кьяляхъ, учу Табасаран драмтеатрин директор Аьлимурад Аьлимурадовдиз зенг гъапIунча ва редакцияйин вакиларин, газатдин подписчикарин терефнаан театрин вари коллектив тебрик гъапIунча.
«2023-пи йисан, Расул Гьямзатовдин 100 йисандин юбилейиз, вари театрариз шаирин яратмишариан спектаклар дивуб табшурмиш гъапIнийи. Гьадмуган учу дугъан «Дагълу риш» поэмайиан «Асият» кIуру спектакль дивнийча. Хъа «Дагъустан мяълийиинди адлу гъапIдар» ихь республика машгьур гъапIу шаирариз бахш дапIнайиб ву. Сабпи ражари думу фестиваль гьяракатнаъ ипу йисан учу ихь машгьур шаир Кьалухъ Мирзайин уьмрикан, дугъан яратмишарин бинайиин алди, спектакль улупнийча. Думуганра жюрийи сабпи йишв тувнийчуз.
Конкурсдин кьяляхъ узуз республикайин культурайин министр Зарема Бутаевайи зенг гъапIнийи ва, хусуси театр, репетицйир гъахуз саб жюрейин шараитар адарди, Табасаран театрин коллективди нубатнан ражари варитIан заан натижйир улупурайиваликан гъапну ва чан терефнаан вари коллективдиз баркаллагь пуб ккун гъапIну.
Му фестивалиъ ихь театр Гран-прийиинди лишанлу апIуб театрин коллективдин аьхю хъуркьувал ву. Спектакль улупу йигъан, жюрийин членар дидкан улхруган, учуз кьюбпи-шубубпи йишварикан сабуну йишв шул кIури, фикир гъабхьнийиз, гьаз гъапиш спектакль учв лап ужуб гъабхьну, актерарира думу йигъан ужуб ляхин гъапIнийи. Хъа фестивалин натижйир йивурайи вахтна, дюзди кIурза, варитIан ужуйи ролар уйнамиш гъапIдар ктухурайган, хъасин йишвар туврайган, ихь театрин ччвур дибрисрайивали, кIвак гъалабалугъ кипнийиз. Гъавриъ даршули гъахьунзу. Гран-при айиб аьгъдайзуз. Хъа аьхириъ ихь театриз варитIан заан йишв тувиган, сацIиб мюгьтал ва лап шад гъахьнийза. Гьадмусяаьт коллективдиз хабар тувунза.
Дупну ккундуки, Гран-при сабпи йишвтIан заануб ву, думу анжагъ жюрийин членари варидари сабишв’инди саб спектакль варитIан ужубси гьисаб гъапIиган, туврайиб ву.
«Асият» спектакль дивур РД-йин искусствйирин лайикьлу деятель, Санкт-Петербургдиан дих дапIнайи машгьур режиссер Дмитрий Павлов ву. Шиърариинди вуйи спектаклар театрари лап цIибдитIан диври шулдар. Хъа ич актерариз дициб тажруба айи, гьаддиз ужуб спектаклра гъабхьну. Актерарикан фужкIа асас вуди жара апIуз ккундарзуз, варидари сабхилди тярифназ лайикь ляхин гъапIну, чухсагъул чпиз», – гъапнийи Аьлимурад Аьлимурадовди.
Дугъриданна, РФ-дин ва РД-дин лайикьлу артист, театринна кинойин кIакIначи актер Михаил Морозов кIулиъ ади жюрийин вакилар – РД-йин писателарин союздин председатель, Дагъустандин Халкьдин шаир Марина Аьгьмедова-Колюбякина, Дагъустандин Халкьдин художник Ибрагьимхалил Супьянов, «Дагъустан дишагьли» журналин кIулин редактор Хамис Шамилова, РД-йин искусствйирин лайикьлу деятель, театрин критик ва театровед Наталья Гъазиева –Табасаран театрин спектакли гьяйран гъапIну. Дурари варидари театрин актерарин устадвализ заан кьимат туври, мани гафар гъапнийи. Мидланра гъайри, Табасаран драмтеатрин артистарин адресназ Табасаран райондин глава Мягьямед Къурбановди, Южно-Сухокумск шагьрин глава Сеидягьмад Мамадовди чпин телеграмм-каналариъ тебрикнан гафар гъидикIну ва театрин репертуариъ айи гьарсаб жара спектаклси, «Асият» спектаклра театрин бажаранлу актерарин нубатнан устадвалин заан кьиматназ тялукь ляхин гъабхьиваликан гъапну.
