Айгуль Мягьямедова

 

21-23-пи апрелиъ Москвайиъ «БицIи ватан – Урусатдин кьувват» Вариурусатдин муниципальный II форум кIули гъубшну. 60 касдикан ибарат вуйи РД-йин Главайин ва Правительствойин администрацияйин руководитель Мягьяч Уьмаров кIулиъ айи Дагъустандин делегацияйин дахилнаъди форумдин ляхниъ Табасаран райондин глава Мягьямед Къурбанов, Дагъустандин Огни шагьрин мэр Замир Гьяжимурадов иштирак гъахьну.

 

21-пи апрели Урусатдин Президент Владимир Путин «БицIи ватан – Урусатдин кьувват» Вариурусатдин муниципальный форумдин иштиракчйирихъди гюрюшмиш гъахьну.

Урусатдин субъектарин муниципальный образованйирин главйирихъди вуйи сюгьбатнаъ «Игитарин вахт» проектдин иштиракчи, РФ-дин Яракьлу Кьувватарин десантдинна алжагъбан 76-пи дивизияйин полкнаъ гъуллугъ апIури гъахьи Н. Муссагалеевдин суалназ жаваб туври, гьюкуматдин кIулиъ айири дугъахъди сатIиди дявдин гъуллугъ гъубхдариз саламар хътауб ккун гъапIнийи.
«Гьар йигъан десантдинна алжагъбан 76-пи дивизияйикан ебхьуразуз: гьамциб ляхин тамам гъапIну, гьаму йишвахьна гъушну, алжагъну, гъибисну – гьар йигъан ебхьуразуз.

Думу мялуматарин мяна фициб ву? Дивизияйи лайикьлуди, дирбашди, натижа ади ва игитариси ляхин апIура», – къайд гъапIну Владимир Путинди.
РФ-дин Яракьлу Кьувватарин десантдинна алжагъбан 76-пи дивизияйин кIулиъ айир ихь ватанагьли, Дагъустандин Огни шагьриъ бабкан гъахьи Табасаран райондин СулантIил гъулан вакил шубуб ражари Кьягьялвалин ордендин сагьиб Аьбдулязиз Шихябидов ву. Думу цци 25-пи февралихъанмина РФ-дин Президентдин Указниинди Урусатдин Федерацияйин ВДВ-йин гвардейский десантдинна алжагъбан 76-пи дивизияйиъ генералин гъуллугъниин тяйин дапIна.

«БицIи ватан – Урусатдин кьувват» вариурусатдин муниципальный форумдиъ иштирак гъахьи Дагъустандин Огни шагьрин Глава Замир Гьяжимурадовра «ИлдантIан ижми» кIул тувнайи тематический майдандин игитарикан сар гъахьну. Думу майдандин асас метлеб Ватандиз гьякьлуди гъуллугъ апIурайидарин тажрубайикан, уьлкейин муниципальный тешкилатари Ватан уьбхбак киврайи пайнакан ктибтуб вуйи.