Мейлан Нежефов
Украинайин жилариин гъябгъюрайи хусуси мяна айи дявдин операцияйин женгариъ дирбаш’вал улупбаз лигну, Табасаран райондин агьали Межид Аьлимягьямедов «Жюрэтлувализ лигну» медализ лайикьлу гъахьну.
Межид Аьлимягьямедов 1994-пи йисан 28-пи сентябри Табасаран райондин Туруф гъулаъ МутIалим ва Марисет Аьлимягьямедоварин хизандиъ бабкан гъахьну. Заан аьгъювалариинди Дербентдин педагогвалин колледж ккудубкIу жигьил призывдиинди армияйин жергйириз душну, 2015-2016-пи йисари Карелия Республикайиъ Элисенваара шагьрин Финляндияйихъди вуйи аьтрафариин Ватандин улихь жвув’ин али эскервалин буржи намуслуди кIулиз адабгъуру. Армияйин кьяляхъ шубуд йисди лихуз гъягъюри-гъюри, хизандин мадар апIури гъахьну. 2019-пи йисан августдин эвелиъ уьлкейин Яракьлу кьувватарихъди контракт йибтIну, Межидри Ватандиз гъуллугъ апIувал Буйнагъск шагьрин мотострелковый частналан ккебгънийи. 2020-пи йисан 14-пи январиъ учв хизандихъди Каспийск шагьриз кючмиш гъахьиган, гьадму шагьрин гьюлин пехотайин частнаъ гъуллугъ давам апIуз хъюгънийи.
2022-пи йисан 24-пи феврали ккебгъу хусуси метлеб айи дявдин операцияйиъ иштирак хьуз сифте кIулиан хушниинди гъушу кьягьяларин дестейиъ Межидра ади гъахьну. Донецк Халкьдин Республикайин Сладкое гъулан багахь миллетчйирихъди гъахурайи гъагъи женгариъ дугъаз зиян ва контузия гъабхьну. Межид Аьлимягьямедов «Хусуси метлеб айи дявдин операцияйин иштиракчи», «Жюрэтлувализ лигну» медаларин ва йицIбариинди гьюрматнан грамотйирин сагьиб ву. Каспийск шагьриъ реабилитацияйиъ айи Межидри йицIуд йисансан контракт давам апIуз къул гъизигну.
Ватан уьбхювалин гьевес Межидрин дамариз аьхю аба Аьлимягьямедов МутIалимдихьан (думу Ватандин Аьхю дявдин иштиракчи ву) ва эм Аьлимягьямедов Якирихьан (Чечен, Цхинвалин, хъа гьамус Украинайиъ гъягъюрайи гьядисйирин иштиракчи) гъафиб ву.
Чан уьмрин юлдаш Фаридайихъди Межидри Салима ва Сафия кIуру шубар тербияламиш апIура. Каспийск шагьрин мектебариъ гъи ихь ватанагьли таниш дару урхурайир гьеле-меле адаршул, фицики думу шагьрин «Дагъларин кIваинди ими» тешкилатдин руководителин заместитель ву. Дугъу, мектебариъ урхурайидарихъди гюрюшмиш шули, дурариз ватанпервер тербия тувра. Улихьна йигъари Каспийск шагьрин главайи, Ватан уьбхрударин йигъахъди тебрик апIури, Межид администрацияйин терефнаан чухсагъул мялум апIру гьюрматнан кагъзиинди ва пешкешниинди лишанлу гъапIнийи.
