Гюльнара Мягьямедова
Гьамусяаьт Урусатди гъабхурайи хусуси метлеб айи дявдин операцияйиъ иштирак шулайи эскрар, офицерар, чпин хушниинди Ватандин маракьар уьрхюз душнайидар – гьамрар вари игитар вуди гьисаб апIуз шулу. Дурари миллетчйирихъди вуйи женгариъ кьягьялвал улупури, ихь закурин йигъ ислягьуб, акуб хьпан бадали, Ватандин хатIасузвал тямин апIури, хилиъ яракь ади уьлкейин сяргьятар уьрхюра. Швнуб ражари дупну ашра, текрар апIуз ухьу буржлу вухьа: табасаран баяри уьлкейин ватанперверарин арайиъ лайикьлу йишв дибисна.
Улихьна йигъари ТинтIарин гъулан советдин администрацияйиз ФуркIил гъулан агьали Намин Ражабовди гъуллугъ апIурайи 58-пи уьмуми кьушмарин армияйин кIулиъ айи генерал-лейтенант Сергей Медведевдин терефнаан чухсагъул мялум апIурайи кагъаз гъафну. Кагъаз, Запорожский областдиъ хусуси метлеб айи дявдин операцияйин иштиракчи Намин Ражабов намуслуди тербияламиш апIбаз лигну, дугъан адаш Ислам Асланбеговичдин ва дада Шерфе Къазиевнайин адресназ хъадапIнайиб вуйи.
Кагъзиъ гьамци дупна: «Гьюрматлу адаш Ислам Асланбегович ва дада Шерфе Къазиевна! 58-пи уьмуми кьушмарин армияйин командованиейин терефнаан гьамцир намуслу бай тербияламиш апIбаз учвуз кIваантIан чухсагъул мялум апIуз ккундузуз. Учвуз жандин мюгькам сагъ’вал, хушбахтвал, шадвал ва уж’вал ккун апIураза. Учву апIурайи гьарсаб ляхниъ ягъур ибшри, хъуркьувалар ишри, хъа уьмрин рякъюъ вафалу дустартIан алалахъри, ичв кIван гьяракат, зегьметниин юкIв аливал жарадариз чешне ибшри, жандин кьувват кам дарибшри».
«ТинтIарин гъулан совет» СП-йин МО-йин кIулиъ айи Хизритдин Сяидягьмадовди кагъаз Намин Ражабовдин абйир-бабарихьна туври, гьамцир ватанпервер тербияламиш апIбаз чухсагъул мялум дапIну, дурариз сагъвал ккун гъапIнийи. Серенжемдиъ гъулан поселениейин администрацияйин главайин заместитель Зейналабид Исаев ва ВУС-дин гъуллугъчи Фарман Мягьямедов иштирак гъахьнийи.
Чухсагъул мялум апIурайи кагъаз гъюбкан мялумат гъафиган, узу Намин Ражабовдин адаш Ислам Ражабовдиз телефондиан зенг гъапIунза. Думу мектебдиъ дарс киври, дарснаъ айи. Дарс ккудубкIиган, дугъахъди сюгьбат гъубхунза.
Ислам Асланбегович Ражабов мектебдиъ мялимди лихури 45 йис ву. Дугъу ва дугъан уьмрин юлдаш Шефре Къазиевнайи 4 велед – 2 бай ва 2 риш – тербияламиш гъапIну. Ислам Ражабовди чан веледариз ужуб тербия тувну, кьюрид баярра хусуси метлеб айи дявдин операцияйин иштиракчйир ву. Шубарра чпин хизанарихъди яшамиш шула.
«Намин контрактдиинди военный гъуллугънаъ ади 14 йистIан артухъ ву. Урусатди хусуси метлеб айи дявдин операция ккебгъруган, ич бай Чечен Республикайиъ оборонайин министерствойин кьушмарин жергйириъ гъуллугъ апIурайи. Думу 2022-пи йисан 24-пи февралихъанмина хусуси метлеб айи дявдин операция гъабхурайи йишваъ а. Наминдин хизан Огни шагьриъ яшамиш шула.
Баяр хусуси метлеб айи дявдин опрерацияйиъ айи абйир-бабарин юкIвар гьарган сикинсузди шулу. Гьадму дявдин операция ккудубкIну, баяр фила чпин хизанарихьна кьяляхъ гъюйкIан кIури, ккилигури шулча.
Наминди гъуллугъ апIурайи частнаан чухсагъул мялум апIбан кагъаз гъафиган, учу гизаф шад гъахьунча. Думу учу туву тербияйин натижаси, гъуллугъ гъабхурайирин ляхнихьна вуйи жавабдарвал, рафтар ву», – гъапнийи Ислам Ражабовди.
Намин Ражабовдин хъуркьувалариин, дугъан абйир-бабарихъди, гъуландарихъди, райондин ва республикайин агьалирихъди сабси, учура гизаф шад вуча. Табасарандин жигьиларин кьягьялвалиинди дамагъ апIурахьа. Дурар Ватандин гъудуркьу ватанперверар ву.
