Гюльнара Мягьямедова
Августдин 5-пи йигъан Дагъустандин Глава Сергей Меликовди республикайин важиблу месэлйир гьял апIбаз бахш дапIнайи совещание гъубхнийи. Душваъ асас вуди машин хъапIуз, яракь гъадабгъуз думу ишлетмиш апIуз ихтиярнан справкйир тувру медицинайин тешкилатар артухъ апIбан гьякьнаан ва гьацира уьмуми образованиейин тешкилатар урхбан цIийи йисаз гьязурлугвалин месэлйир гъитIирккнийи.
Июлин вазли Дагъустандин ЦУР-и 13 агъзуртIан артухъ аьрзйир гьисабназ гъадагъна. РД-йин АГиП-йин кIулиъ айи Мягьяч Уьмаровдин гафариинди, дурарин саб пай электроэнергия адруваликан ву. Электроэнергияйин месэлайин кьяляхъ ватандашари штухъди тяминди дарувалин ва хъархъвас адабгъури адрувалин месэлйир за апIура.
Мягьячгъалайиъ яракь гъадабгъбаз, думу ишлетмиш апIбаз ва машин хъапIуз ихтияр гъадабгъбаз вуйи медицинайин справкйир тувру пунктнахъ шлу аьхю нубатнакан гизафдариз хабар а.
Справкйир тувру духтрарихьна вуйи нубатар цIиб апIуз Дербентдиъ, Кизляриъ ва Хасавюртдиъ аьлава пунктар ачмиш дапIна. Совещаниейиъ удучIвну гъулху республикайин сагъламвалин министр Ярослав Глазовди туву мялуматариинди, аьлава пунктариан 5 вазлин арайиъ 1130 справка тувна.
Улихьнаси, агьалйирин терефнаан гизаф аьрзйир айивализ дилигну, региондин Главайи Дагъустандин жара шагьрариъра Республикайин психоневрологический ва наркологический диспансерарин филиалар ачмиш апIбан мумкинвалариз лигуб ккун гъапIнийи. Эгер хьуб вазлин арайиъ, духтрарин лихру вахт гьисабназ гъадабгъну, 20 агъзур справка тувнуш, духтрихьна дуфнайи гьарсар ватандашдиз 3-4 дакьикьа вахттIан жара дарапIу гьисаб шула. Гьаму вахтнан арайиъ психологияйин сагъвалин гьякьнаан духтрихьан фу аьгъю апIуз шулухъа?! Мидланна савайи, аьхю нубатар хъайивали коррупцияйин ляхнизра рякъяр ачухъ апIуру.
Ярослав Глазовдин гафариинди, месэла гьял апIбан бадали, Дербентдин, Кизлярин ва Хасавюртдин медицинайин идарйирин гъуллугъчйир республикайин психдиспансериз ляхниз кьабул дапIна. Гьаму йисан октябрин ваз улубкьайиз гьадму жюре пунктар Леваши ва Къарабудагъкент районариъра ачмиш апIбанди ву.
ЦIийи пунктар гьякъи тувру терминаларихъди тямин дапIна, туву справкйирин гьякьнаан улупбар дишлади МВД-йиз хътауб планламиш апIура.
«Гьамус ухьу ватандашарин сагъламвал ахтармиш апIбан ерийиз ва справкйир тувбан ляхин дюзди ккабалгбаз артухъ фикир тувну ккунду. Кючйириъ дивнайи камерйирин улупбариинди, машин хъапIрайи гизафдариз психиатри справка тувну ккундайи.
Вари шартIар арайиз духну сар ватандаш 30 секунддин арайиъ ахтармиш дарапIруган, духтрарихьна вуйи тIалабар артухъ хьиди. Ухьу гъавриъ духьну ккунду, коррупцияйиз рякъяр хъяркьдихьа», – къайд гъапIну Сергей Меликовди.
Эгер гьюкмин кIулиъ айидари диврайи тIалабар духтрари тамам гъапIиш, гизафдар медицинайин справкйир адарди гъузуз мумкин ву.
Совещаниейиъ, уьмуми образованиейин идарйирин урхбан цIийи йисаз гьязурлугваликан улхури, РД-йин образованиейин ва илимдин министр Ягь’я Бучаевди гъапиганси, Дагъустандиъ, 1381 мектеб ва бицIидарин 880 багъарра кади, образованиейин 2748 идарайи ляхин апIура. Гьамусяаьт дурар гьязурди айивалин гьякьнаан муниципальный комиссйири актар дикIура. Аавгустдин 5-пи йигъаз 17 муниципалитетдиан улупбар хъадаъна. Образованиейин идарйирин 20,3 % гьязурлугвалар духьнайиб тяйин дапIна.
1-пи сентябри 5140 бицIириз йишвар айи цIийи 14 мектеб ва 450 бицIириз йишвар айи бицIидарин кьюб багъ ачмиш апIиди. 8 мектебдиз ва бицIидарин саб багъдиз лицензия тувна. 6 мектеб ва бицIидарин 1 багъ чпи кьабул апIбан актариз ккилигура.
22-пи августди республикайин образованиейин вари идарйириъ хатIасузвал уьбхбан Вариурусатдин ученйир гъягъиди.
Дагъустандин Главайи региондин образованиейин объектарин гьязурлугвалин месэла тикилишчивалин министерствойин вакилар ва районарин главйир жалб дапIну, жаради вуйи совещаниейиъ гьял апIбан теклиф дивну.
