Гюльнара Мягьямедова
21-пи сентябри Дагъустандин Къарабудагъкент райондиъ айи «Каспий» санаторийин бинайиин Варихалкьарин динарин арайиъ гъабхру жигьиларин ХII форум ачмиш гъапIну. Думу 25-пи сентябризкьан давам хьибди. Урусатдин жюрбежюр регионариан, Сербияйиан, Грузияйиан, Ирандиан жигьилар, экспертар, багахь ва ярхлаъ айи харижи уьлкйириан диндин аьлимар уч апIури, ихь республика динарин ва миллетарин арайиъ важиблу сюгьбатар гъахру аьдати майдан дубхьна. Форумдин дахилнаъди шубуб диндин выставкара ачмиш дапIна.
22-пи сентябри Дагъустандин Правительствойин председатель Аьбдулмуслим Аьбдулмуслимов терроризмдин идеология тарабгъбаз аьксивал улупбан месэлйириз бахш дапIнайи Варихалкьарин динарин арайиъ гъабхру XII форум ачмиш апIбаъ иштирак гъахьну. Сифте думу форумдин майдандиин ккатIабццнайи шубуб конфессияйин выставкайиз гъилигнийи. Душваъ мусурман диндин, хачперезарин, жугьдарин гирами дафтрар, диндин искусствойин яратмишар: иконйир, дизигнайи шиклар ва жара алатар айи. Форумдиъ дишагьлийириз ягълухъ уччвуди алабхъуз улупури, жигьил шубари мастер-классарра гъахура.
Правительствойин председатели милли политикайин ва дин-дин ляхнарин министрин вазифйир тамам апIурайи Темирлан АбутIалимовдихъди ва РД-йин главайин теклифчи Энрик Селимовдихъди форумдин майдандиъ туврайи Зам-зам шидра гъубхънийи.
Форум ачмиш апIури, Аьбдулмуслим Аьбдулмуслимовди Дагъустандин ругариина форумдиз уч духьнайидариз республикайин глава Сергей Меликовдин саламарин кагъаз гъурхнийи. Премьер-министр Дагъустандиан ва уьлкейин жара регионариан форумдиъ иштирак шулайи жигьиларин тешкилатарин вакиларихьна жаради илтIикIнийи. «Учву гьаму форумдиъ цIийи аьгъюваларин эйсйирси, жара дин, культура хъапIрударин юкIвар сатIи апIру мюгькам дакьат ишричва. Жигьил насил гележегдин вакилар ву. Учву форумдиъ иштирак хьуб, ислягьвал ва дуствал ихь Ватандин мюгькам артмишвалин бина вуйивал тасдикь апIбан лишан ву», – гъапну премьери.
Серенжемдин иштиракчйи-рихьна ва хяларихьна вуйи чан илтIикIбаъ Республикайин Правительствойин кIулиъ айири къайд гъапIганси, Урусатдиъ хъаърайи аьдати динар инсанар сатIи апIурайи дакьатар ву. Дурари халкьарин арайиъ аьлакьйир уьрхюз, ужувлан, гьякьлувалин ва рягьимлувалин ляхнар гъахуз кюмек апIура, гьацира ватанпервервалин тербия тувбак важиблу пай кивра.
Республиикайин премьер-министри гъапиганси, аьхиримжи йисари Урусатдиз цIийи хатIйирин читинвалар алахьна, дегьзаманйирихъанмина албагну яшамиш шулайи жямяаьтлугъдин, миллетарин ва жара дин хъапIрударин (гьадму гьисабнаъди Кафари Кавказдиъра), арайиъ айи аьлакьйир чIур апIуз ккунди, харижи уьлкйириан терроризмйин идеология тарабгъру нягьякьяри ляхин гъабхура. «Дицисдариз жаваб вуди, ухьу жигьиларин, жара культура хъапIрайидарин арайиъ чиб-чпихьна вуйи гьюрмат артухъ дапIну ккунду. КчIибгурайи душманвализ аьксивал сатIиди апIру ужудар ляхнарихьантIан, дугъри сюгьбатарихьантIан улупуз шулдар», – гъапнийи Аьбдулмуслим Аьбдулмуслимовди.
Дугъу гьацира Урусатди гъабхурайи хусуси метлеб айи дявдин операцияйиъ, Ватандин милли маракьар ва цIийи регионарин агьалйирин ихтиярар уьрхюри, ихь уьлкейин вари регионарин вакилар иштирак шулайиваликан, Дагъустандин 15 вакилиз Урусатдин Федерацияйин Игит ччвурар тувнайиваликан ктибтнийи. Кьягьял эскрар чешне вуди дерккри, гъийин жигьилари дурариин дамагъ апIруси ляхин дубхну ккунду, – насиягьт тувнийи Аьбдулмуслимовди.
Форумдин программайин дахилнаъди «гергми столар», политикайин ва жямяаьтлугъдин машгьур касарихъди гюрюшмишар, акцйир, образованиейин сюгьбатар, терроризмйин идеологияйиз аьксивал улупбан къанунар аьгъювалин олимпиадйир гъахура. Мидланра савайи, форумдин майдандиъ гьар йисан гъабхурайи терроризмйин идеология ярхла апIбаз бахш дапIнайи Вариурусатдин илимдинна тажрубайин конференцияра планламиш дапIна.
