Шюшеханум Керимова
1990-пи йисан ООН–дин Генассамблеяйи адабгъу къарарниинди, чвулин кьюбпи вазлин садпи йигъан яшнаъ айи агьалйирин йигъ къайд апIура. Му машквар арайиз гъюбан мяна планетайиин али вари агьалйириз, дурариз алахьурайи читинвалариз фикир тувуб ву. Гьаддиз, му йигъан вари шагьрариъ, гъулариъ шадвалин мяракйир кIули гъахура ва ихь яшлу агьалйир жямяаьтлугъдиъ гъягъюрайи гьядисйириъ иштирак хьпан бадали, дурариз шартIар яратмиш апIбаз фикир тувра.
Сентябрь вазлин аьхиримжи йигъан Дербент шагьриъ яшнаъ айи агьалйирин интернатдин хянаъ му йигъаз бахш дапIнайи мярака кIули гъубшну. Серенжемдиъ ихь ватанагьли, гьар вахтна кюмекнан хил гьачIабккуз гьязур вуйи ва му хулаъ яшамиш шулайидариз ва лихурайидариз ужуди таниш вуйи, му тешкилатдин попечительский советдин вакил дилаварчи Айваз Рамазанов, шагьрин КЦСОН-дин директор Тимур Саругланов, шагьрин дишагьлийирин советдин председатель Валерия Хасанова, шагьрин жямяаьтлугъ советдин вакил Алла Мусаева, Дербент шагьрин культурайин отделин кIулин пишекар Диляра Султанова, «Каспий» ялхъвнарин ансамблин регьбер Севиль Багъирова, Бестужев–Марлинскийин ччвурнахъ хъайи музейин пишекрар, ДДЮТ-дин, табасаран ва азербажан театрарин коллективар, Дербент шагьрин 15-пи мектебдиъ урхурайидар ва шагьриъ айи Дагъустандин образованиейинна культурайин академияйин студентар иштирак гъахьнийи.
Му йигъан интернатдиъ яшамиш шулайидар ва гъирагъдиан дуфнайидар жюрбежюр хурагар, йимишар ва меълишнар али столарихъ деънайи, ва тарагъурайи музыкайин мукьмари, мяълийири варидарин юкIвар рази апIурайи. Уч духьнайидариз ДДЮТ-дин «Гном» кIуру группайи гъурху шиърар кьабул гъахьнийи. Мярака мяълийирин устад Даштибег Исмяиловди устадвалиинди кIули гъабхнийи. Ухьуз варидариз таниш вуйи «Дадайин улар»(«Мамины глаза») кIуру мяъли Аьлекпер Шагьмурадовди апIру вахтна, му гьюкуматдин хулаъ яшамиш хьуб кьисмат гъабхьи дишагьлийирин уларихьинди лигуз даршули, нивгъар дерккуз дархьидарра айи.
Табасаран драмтеатрин актёрар Аьбдулла Мирзакеримовди, Альфия Мурсаловайи, Мягьямедзакир Рамазановди мяракайиъ гъапIу мяълийирра юкIварик гьевес кипрудар вуйи.
«Каспий» ансамблин ялхъвнар, Даштибег ва Хуршида Исмяиловари гъапIу мяълийирра уч духьнайидариз гизаф кьабул гъахьнийи, ва, интернатдиъ айидари яшназ дилигди, ялхъвнариз удучIвури, дуфнайи хяларра ялхъвнариз теклиф апIури, шадди вахт гъапIнийи.
Гьарганси, му йигъанра машкврин столариин диврубдин гъайгъу зигру Айваз Рамазановди чан улхбаъ му йигъахъди яшлу агьалйир тебрик апIури, тешкилатдиз учв гьарган кюмек апIуз гьязур вуйибдикан гъапну ва дуфнайи артистариз чухсагъул мялум гъапIну. Дуфнайи студентари гьарсар дишагьлийиз кюкйирра бахиш гъапIнийи.
Интернатдин директор Марина Гьяжиевайи къайд гъапIганси, гьамусяаьт мушваъ 57 кас яшамиш шула. Дурарин арайиъ 13 дишагьли, 44 жилар ву. Гьацира, интернатдиъ 40 пишекар лихура. Кьисматнаан гьюкуматдин тешкилатдиъ яшамиш хьпакк ккуркьу агьалйириз мушваъ лихурайи пишекрарин, сабпи нубатнаан, директорин вазифйир кIули гъахурайи Марина Мягьядовнайи ужуб хъайивал апIурайивал дярябкъди гъузуз шулдайи. Яшнан аьхюдарира чпин директориз «дада» кIура.
Мярака алдабгъурайи вахтна мушваъ яшамиш шулайи Людмила халайи чпин варидарин терефнаан дуфнайидариз, гизафси директориз ва имбу вари пишекрариз аьхю чухсагъул гъапну.
«Гъи яшнаъ айидарин йигъаз бахш вуйи мяракайиз уч духьнахьа, хъасинганра учу учвуз варидариз ккилигурача, узу, узуси имбударра, музыкайихъ, мяълийирихъ юкIв хъайидар ву», – давам гъапIну коляскайиъ айи дишагьлийи.
Му яшлуйирин хулаъ яшлударси, жигьил яшнаъ айи инвалидарра яшамиш шула. Музыкайин сес гъеебхьубси, гьевес кубчIвру Русланди му йигъанра ялхъвнариз гизафдариз теклиф апIури, мяракайиин ранг алапIнийи. Гъябгъюрайи мярака вари видеойиз адабгъури, шиклар йивурайи жигьил бай Маратра интернатдиъ яшамиш шулайир вуйи.
«Учу гьаму мани хулаъ яшамиш шулача», – гьамци кIура мушваъ айидари. Гъит, му интернатдиъ манишин артухъ ибшри, гьарсар яшлу, инвалид касарин уьмриъ шадвалин йигъар бул ишри!
