Зубайдат Шябанова
Девир гьялаки нирси дигиш шулашра, Дагъустандиъ кюгьне деврин гьядисйириз багахь вуйи дюшюшар шули ими. Гьаци, сар дишагьлийи, швушван ва чан балин мюгьюббатназ къаршуди удучIвну, швушв аьжалихъна гъахну. Му дюшюшдикан республикайин СМИ-йин вари дакьатариъ, социалин сетариъ дибикIну гъабхьну, фицики думу цци хьадну Дагъустандин машгьур артист, мяълийирин устад Рукьият Сатыбаловайин хизандиъ гъабхьиб вуйи. Ва, газатдиъ «Инсанар ва кьисматар» рубрика абццган, учхьанра думу гьядисайикан дибрикIди гъибтуз гъабхьундарчухьан.
Кизилюрт райондин Чонтаул гъулаъ кьюр жигьилин юкIвар чиб-чпиин бицIивахтнаантIан улукьнайи. Йисар гъягъбахъ дурарин мани гьиссар аку, ижми ва лап ялавлу мюгьюббатназ илтIикIну. Дурар багахьлуйир вушра, хал-хизан ккебгъуз кьюбиб терефариан вуйи абйир-бабар рази гъахьнийи. Дагъустандиъ багахьлу веледар эвленмиш духьну, хизанар ккергъбан дюшюшар кми-кмиди алахьуру.
Дурарин уткан ва девлетлу сумчрин, швушван палтар али чан шураз мяъли апIурайи Дагъустандин эстрадайин хяд Рукьият Сатыбаловайин видеойир Кавказдин хайлин пабликариъ тарагъну гъахьнийи.
Сумчрин кьяляхъ жигьилар сижар бабахъди гъулаъ яшамиш шули гъахьну. Сакьюдар вазарилан жигьилари жаради яшамиш хьуз йикьрар апIуру. Кирайихъ чпиз дустру хал дибисну жаради яшамиш хьуз хъюгъюбси, сижар швушваз къаршуди удучIвуру.
Балин дада Жамиля Сатыбаловайи кучIлар дапIну, гужниинди, бай чан хулаз гъахуру ва маллайин кюмекниинди, телефондихъан шураз нюкягь чIюбгъюрайиваликан хабар тувуз гъитру.
ПатIиматди чан ккуни жилириз нюкягь батIул апIру гафар макIан кIури, миннатар апIури, чпин сар-сариз ккунивал кIваин апIури, ишури гъахьну.
БицIи вахтналан вари Дагъустандиъ думу риш больницайиъ реанимацияйиъ кечмиш гъахьивалин хабар абхънийи. Жигьил швушву чав чаин хил иливбакан, яна аьжал кьабул гъапIбакан кIурайи. Хъа багахьлуйири му хабрар дюзидар даруб субут гъапIну. Духтрарин гафариинди, дурари чпихьан шлуб вари гъапIну, амма чан жилирихьна вуйи мюгьюббат, думу хътарди гъузуз даршлувал, жилирихьна вуйи марцци ялав яваш апIру дарман дурариз гъибихъундар. Шуран юкIв гъутIубкIну.
Чан ккуни ПатIимат реанимацияйиъ айибдикан хабар гъабхьи бали, раккнар урччвури, учв деетай кIури, гьарйир апIуйи. Дадайи бай кIучIлар дапIну, раккар хъяркьну хулаъ итнийи. Бали ОМОН-диз, МЧС-диз зенгар апIурза кIурашра, дадайиз вижна ктайи. Чаз раккнар адрарццруваликан аьгъю гъабхьиган, бай кьюбпи мертебайин унчIв’ан урсру ва больницайиз жаргъуру. Амма думу хъуркьайиз кьан гъабхьнийи… ПатIиматдин яшар 19 йистIан дайи, хъа дугъан ккуни жилир сад йисан аьхюр вуйи.
Риш кивну. Швнуд-сад йигъан бай я шид дурубхъри, я уьл дирипIри, чан ккуни ПатIиматдин накьвдихъ хъади гъахьну. Швнуб-саб ражари думу душвахъ амриан душнади гъидихънийи.
Дагъустандин агьалйир му гьядисайин кьяляхъ социалин сетариъ чпин фикрар ачухъ апIбаан кьюб терефназ жара гъахьну: садари гъийин заманайиз дилигну, жигьил баяр-шубариз, ккебгънайи цIийи хизандин вакилариз яшамиш хьуз ихтияр чпин хилиз тувну ккуниваликан кIурайи. Тмундари аьдатарин тереф уьбхбакан, аьхюдариз уьмур дябкънайиваликан, дурар варибдин дюз вуйиваликан ва аьхиризкьан сижрарин гафарихъ хъебехъну ккуниваликан бикIури гъахьну. Мушваъ телефондихъан нюкягь чIюбгъюз гъиту малла гьякь даруваликан кIурайидарра хайлин айи.
Социалин сетариъ гъакIи шуран успагьиваликан, дугъан ужуб тербияйикан, аькьюллуваликан, дугъан ужуб хизандикан бикIури, чпин ккуни артисткайиз ва дугъан багахьлуйириз башсагълувал ккун апIурайидар гьамусра а.
Шуран дада Рукьиятдин хизанари гъавумар жазайихъна хуб тIалаб гъапIундар. Дурар Аллагьдиина гъибтна.
