Зубайдат Шябанова

 
Сентябрин 14-пи йигъан Мягьячгъала шагьриъ, Дуствалин хулаъ, Дагъустандин халкьарин сабвалин йигъ къайд апIурайи мажлисариъ, РД-йин главайин вазифйир вахтназди тамам апIурайи Федор Щукинди республикайиъ тафавутлу гъахьи ватандашариз гьюкуматдин пешкешар тувну. Пешкешарин сагьибар гъахьидарин арайиъ Табасаран райондин образованиейин управлениейин методист Изамет Гьяжиевара айи. Республикайин кIулиъ айири думу «Дагъустан Республикайин образованиейин лайикьлу гъуллугъчи» ччвур тувбиинди лишанлу гъапIну.

Ич сюгьбатнаъ Изамет Тажудиновнайи учв лайикьлу ччвурнахъди тебрик апIури, хайлиндарихьан зенгар гъюрайиваликан гъапнийи.
«Гъит му шадвалин гьиссар вари мялимариз кьисмат ишри. Дюзди гъапиш, му ччвурназ кагъзар гьязур апIуз теклиф йиз адаш, райондиъ машгьур мялим Тажудин Мягьярамовди ва ич методический отделин кIулиъ айи Зумрият Мягьямадовайи дивнийзуз. Узуз дурарин гафар ва теклифар кьабул гъахьнийзуз, ва, лазим вуйи кагъзар уч дапIну образованиейин управлениейин начальникдихьна тувунза. Му месэлайихъди ва йиз кандидатурайихъди чпин разивал образованиейин управлениейин кIулиъ айи Аьбдусалам Гьясановдиси, райондин глава Мягьямед Къурбановдира улупну. Дурариз ва йиз ляхнин вари юлдшариз чухсагъул пуз ккундузуз. Му жвуван ляхниз туврайи кьимат ву. Гъит думу заан кьимат вари ихь мялимариз кьисмат ибшри», – гъапну Изамет Гьяжиевайи.
Гьяжиева Изамет Тажудиновнайиз мялимвалин 38 йисандин тажруба а. Дугъу Дагъустандин гьюкуматдин университетдин филологияйин факультет ккудубкIну. Мялимвалин зегьметнан рякъ 1989-пи йисан Хючна гъулан кьялан мектебдиъ урус чIал кивру мялимвалилан ккебгъну. 1995-пи йисан хизандихъди Ставропольский крайдиз кюч гъахьиган, ду-шваъ Красногвардейский райондин образованиейин управлениейиъ методистди дийигъуру. 1997-пи йисхъан дугъу Красногвардейский райондин интернат-спецмектебдиъ урус чIал ва литература дарсар киври гъахьну.

 
2005-пи йисан Изамет Гьяжиева хизандихъди ватандиз кьяляхъ гъюру ва багъри Хючна мектебдиъ нубатнан ражари ляхниъ дийигъуру. Гьадму йисан ноябрин вазли думу Табасаран райондин образованиейин управлениейиз методистдин гъуллугъниина тяйин апIуру. Изамет Тажудиновна гьамусяаьтра душваъ лихура. Дугъу хайлин йисари гъизигу баркаллу зегьмет гьавайиди гъюдубчIвундар. 2011-пи йисан Изамет Гьяжиева «Урусатдин Федерацияйин уьмуми образованиейин гьюрматлу гъуллугъчи» ччвур тувбиинди лишанлу гъапIнийи. Думу гьацира Табасаран райондин администрацияйин, образованиейин управлениейин терефнаан швнуб-саб гьюрматнан грамотайин ва дипломарин сагьиб гъахьну.

 
«Мектебдин сирдихъ инсанди уьмурлуг фикриъ гъузру аьгъювалар гъадагъбахъди сабси, дугъан хасиятнан лишнарра тартиб шулу. БицIири ккебгърайи уьмриз алдагъурайи гамариъ аьхю роль иллагьки мялимди уйнамиш апIура. Гьаддиз мялимдин зегьмет гъи варитIан ваажиблударикан саб ва гьюрматназ лайикьуб ву», – гъапнийи Дагъустандин главайин вазифйир вахтназ вуди тамам апIурайи Федор Щукинди, Изамет Гьяжиевайин хилиз пешкеш туври.
Изамет Гьяжиева му заан ччвурнахъди Табасаран райондин глава Мягьямед Къурбановдира тебрик гъапIну ва багъри юрдарин баяр-шубарин аьгъюваларин дережа за апIбаъ дугъаз аьхю аьшкь, хъана артухъ кьувват ккун гъапIну.