Айгуль Мягьямедова
Дагъустандиъ хусуси метлеб айи дявдин операцияйиъ иштирак шулайи заан образование адру эскрар дявдин гъуллугъчйирин кадрйирин проектдиз жалб апIбан месэла гьял апIбанди ву. Думу теклиф Дагъустандин Глава Сергей Меликовди республикайин важиблу месэлйириз бахш дапIнайи совещаниейиъ гъитIибккну.
Сергей Меликовдин гафариинди, ахтармишари улупурайиси, республикайиъ «Дагъларин жюрэтлувал» проектдиъ иштирак хьуз ккуни хусуси метлеб айи дявдин операцияйин ветеранар ва иштиракчйир гизаф а. Амма дурарикан хайлиндариз заан образование адар – му проектдиз регистрация апIбан бадали лазим вуйи шартIарикан саб ву. Региондин Главайин фикриинди, аьгъювалар гъадагъиш, дицисдарихьанра республикайин заан образование лазим дару жюрбежюр гъуллугъариъ ляхин апIури, мянфяаьт хуз хьибди.
РД-йин Главайи гьюкуматдин гъуллугъарин, кадрйирин ва гьюкуматдин наградйирин месэлйириз лигру управлениейин начальник Земфира Кашкаевайиз РД-йин образованиейин ва илимдин министр Ягь’я Бучаевдихъди сатIиди му месэла гьял апIуб табшурмиш гъапIнийи.
КIваина хурача, «Дагъларин жюрэтлувал» проект «Игитарин вахт» кIуру федеральный программаси гьязур дапIнайи республикайин проект ву. Дидкан Дагъустандин Главайи, уьлкейин Президент Владимир Путиндихъди гюрюшмиш гъахьиган, гъапнийи.
Программайиъ иштирак хьуз Дагъустандиан вуйи хусуси метлеб айи дявдин операцияйин 1300 иштиракчийи аьрзйир тувна. Дурарикан сюгьбатар гъахбан кьяляхъ гъядягъю дявдин гъуллугъчйир идара апIбан кадрйирин резервдиз гъадагъиди. Гележегдиъ дурарихьан республикайин артмиш’валик чпин пай кивуз, агьалйирин яшайишдин ери за апIбан цирклариъ лихуз хьибди.
