Гюльнара Мягьямедова
14-пи августди «Нур» газатдин редакцияйиъ Рутул райондин Жиных гъулан вакил, медицинайин гъуллугънан отставкайиъ айи полковник, духтир, медицинайин илмарин кандидат Тажудин Гьяжиевдихъди гюрюш кIули гъубшнийи. Думу «Урусатдин офицерар» жямяаьтлугъ тешкилатдин региондиъ айи отделениейин президиумдин член ву. Офицери журналистариз 1999-пи йисандин гьядисйирикан ктибтнийи.
«Дагъустандин мединститут ккудубкIур ординатурайин кьяляхъ Псковдин областдин больницайиъ лихури гъахьнийза. 1985-пи йисан Дагъустандиз кьяляхъ дуфну, айтIан ляхнарин органариъ санчастнаъ ляхниъ дийигънийза. ЦIиб вахтналан МВД-йин РД-йиъ айи медико-санитарный частнан начальникдин заместителди лихури гъахьунза. 1990-пи йисар республикайиз гъагъи йисар вуйи. Чечен республикайиъ дявдин женгар айи вахтна медицинайин гъуллугъчйиризра, гьаммишан мина-тина гъягъюри, зийнар гъахьидариз кюмек апIури, сикинвал ади гъабхьундайи. Санчасть бандитари сабпи нубатнаъ бисуз мумкин вуйи объектарикан саб ву. Саб вахтна бандитарин хъял кайи инсанарин сиягьнаъ йиз ччвурра ади гъабхьну. Саб совещаниейиъ гьадмугандин Дагъустандин айтIан ляхнарин министрди лихурайи Аьдилгерей Мягьямедтагьировди узхьан гьерхнийи: «Яв ччвур сиягьнаъ гьапIуз айкIан?» Гъаравлар хъади лицури сад йис гъабхьнийиз.
Новолак райондиъ, Хасавюртдиъ аьгьвалат лап гъизгъинди вуйи, арайиз гъюру дюшюшарихъди аьлакьалу вуди, Казбековский райондиъ ади саб вазкьан гъабхьнийич. Думуган санчастназ къанун уьбхру органарин зийнар духьнайи гъуллугъчйир гизаф хуйи. Санчастнаъ айи духтрариз гъагъиди алабхъуйи, хъа «гъизгъинвал» айи йишвариз офицерартIан гьаъри шулдайи, офицервалин звание айидар думуган кьюртIан адайча, хъа гьамус ду-шваъ 32 офицер а.
Первомайскдиъ гъахьи гьядисйир кIваин илмийиз. Яракьра хилиъ ади, духтрари гьунарар улупуйи, гизафдар аьжаликкан ккадагънийи.
1999-пи йисандин гьядисйирикан улхуруш, саб терефназ ваъ, духтрар вари терефариз гьаънийи. Узу Дургелийиъ гъахьунза. Гизаф хатIалу дюшюшар алахьуйи. Завуъ самолетар, вертолетар тIирхуйи. Разведкайин улупбариинди, бомбар ирчуйи. Женгар гъахурайи йи-швариан зийнар гъахьидар, гъийихдар адагъуб алабхъуйи. Къакъа-шурайиъ дявдин женгар гъахьнийи. Дина гъягъюрайи вахтна бандитари ич гъуллугънан машиндиин гюллдин цIа уьлюбхнийи. Машин хъапIрайи Аьбдул дирбаш водитель вуйи – машиндик гизаф гюллйир куркIнушра, учу сагъди гъузнийча.
Дургелийиз учу дуфну кьюдпи йигътIан дайи, ОМОН-дин гъийиху 12 гъуллугъчи адагъну ккундийи. Рякъяр ужудар даршра, машиндин аквар кархьуз ихтияр адайи. Бандитар фунуб вахтнара улихьинди гьудучIвуз мумкин вуйи. Ич машиндин улихь федеральный кьушмарикан хьади ккундийи, хъа гьяйиф, дициб мумкинвал адайи. Ляхниъ гьацдар читинвал гизаф алахьуйи.
Ерли агьалйири учуз кюмек апIуйи, кми-кмиди учуз ипIруб хьади гъюйи. Учу машинариъ дахъри-гъудужвуйча. Яракьдихъдира тяминди дайча. Сар узухь автомат ва тапанчи хьайзухь. Имбударихь яракь хьадайи. Дагъустандиъ гьаму кьадар бандитар архьрувалихьна сарра гьязурди адайи. Бандитарихъди женг гъабхуз дуфнайи федеральный кьушмарра жигьил, тажруба адру баяр вуйи. Дурар арайиз дуфнайи хатIалувалин гъавриъ бегьем адайи.
Гьадмуган Дагъустандин халкьарин ва игитвалиинди женг гъубху къанун уьбхру органарин вакиларин гьунар дайиш, бандитари Дагъустан Урусатдихьан жара апIуйи. Къарамахи, Чабанмахи гъуларин агьалйир Хаттабдинна Шамил Басаевдин тереф бисуз гьязурди айи. Думу гъулариъ гизаф яракьра айи», – ктибтнийи полковник Тажудин Гьяжиевди.
Магьа гьамус бандитар ихь ругарилан терг дапIну 25 йис тамам дубхьна. Ватан гъюбхю игитарин, думугандин гьядисйириъ иштирак гъахьи ерли агьалйирин ччвурар гьаргандиз ихь юкIвариъ гъузди.
