Гюльнара Мягьямедова
Дагъустан Республикайиъ айи Урусатдин УФСИН – му тахсиркрариз туву жаза юрутмиш апIуз гъитбан гюзчивал гъабхурайи Федеральный гъуллугънан республикайиъ айи орган ву. Душваъ ляхин апIрудариз мюгькам саламатвал лазим ву. Гьаммишан тахсиркарвалар дапIнайи инсанарихъди ляхин гъабхуб дугъри инсандин кIулиз чIуру тясир апIру ляхин ву. Мидланна савайи, думу гъуллугънаъ айидариз (султ, элгьет дарпиди) йишвандинна йигъандин арайиъ фуну вахтна вушра, ляхниз дих апIуз мумкин ву. Гьаддиз, гьар йисан цIийи гъуллугъчйир гъюрашра, думу идарайиъ лихрударин кьитвал гъубзра.
Магьа гьаму йисанра гьадабтIнайи жаза юрутмиш апIру Федеральный гъуллугънан Дагъустан Республикайиъ айи управлениейин жергйир цIийи гъуллугъчйирихьди ацIра: Урусатдин ФСИН-дин дахилнаъ айи вузариъ урхуб ккудубкIнайи 13 жигьил региондин уголовный ва жаза юрутмиш апIру идарйирин гъуллугъариина гьаъна.
ФСИН-дин Дагъустан Респуб-ликайиъ айи Управлениейин начальник, айтIан гъуллугънан полковник Сергей Ролдугиндин регьберваликкди жигьил гъуллугъчйир кьабул апIбан серенжем кIли гъубшну. Думу серенжемдиъ начальникдин заместителар, отделарин ва идарайин аппаратдин кIулиъ айидар иштирак гъахьнийи.
Жигьил пишекрарихьна илтIикIну, Сергей Ролдугинди, дурарин гъуллугънан важиблуваликан улхури, вузар ккудукIну дуфнайидари чпин улихь диву месэлйир намуслувалиинди тамам дапIну ккуниваликан гъапнийи ва дурарикан лайикьлу пишекрар духьну ккунивалик чав умуд киврайивал къайд гъапIнийи. Дугъу гъапиганси, уголовно-исполнительный гъурулушди, пишекарвалин дерин аьгъюваларси, инсандин намуслувалин, гьякьлувалин ва ляхниз вафалувалин гъиллигъар тIалаб апIура. Идарайин кIулиъ айири выпускникарикан Урусатдин Федерацияйин УИС-дин (жаза кIулиз адабгъру гъурулушдин управлениейин) гъуллугъчийин ччвур намуслувалиинди уьбхюб ва чпиз айи аьгъювалар гъурулуш артмиш апIбан ляхниъ ишлетмиш апIуб ккун гъапIнийи.
Серенжемдин жара иштиракчйирира жигьил офицерарин улихь, пишекарвалин рякъ ккебгъну, думу хъуркьувалиинди давам апIуз айи яркьу мумкинваларикан ктибтнийи.
Серенжем ккудубкIбан кьяляхъ жигьил пишекрар гьадму идарайиъ лихури аьхю тажруба гъадабгънайи, лазим гъабхьиш кюмек тувуз гьязур вуйи гъуллугъчйир лихурайи коллективариз гъушнийи.
Хилиъ дипломар айи жигьил 13 лейтенант республикайин УИС-дин жергйириз дуфна. Лап багарихьди дурар идарайин силисар гъахру изоляторариъ ва жара йишвариъ чпин гъуллугънан вазифйир тамам апIуз хъюгъди.
Тазади дуфнайи пишекрар жаза юрутмиш апIру гъурулуш къайдайиз хпан, артмиш апIбан ва уьмуми метлебар тамам апIбан далу шул кIури, умуд кивурхьа.
