Мейлан Нежефов

Дагъустандин главайин къарарниинди 2024-пи йис республикайиъ ХХ-пи аьсрин Гомер, Дагъустандин халкьдин шаир, ашукь СтIал Сулеймандин йис вуди улупна. Ав, рябкъру гьялариан, ццийин йис литературайин серенжемариз бегьерлу йис хьибди, фицики СтIал Сулеймандин 155 йисандин юбилейихъди сабси, цци дагъустан халкьарин литературайиъ чпин бикIбан хатI гъибту ва хусуси йишв гъибису шаирар Рабадан Нуровдин 135 йис, Эффенди Капиевдин 115 йис, Анвар Аджиевдин 110 йис къаршуламиш апIиди.

ИкибаштIан, зиихъ кудухнайи шаирарин кьяляхъ табасаран халкьдин шаирарра гъузнадар. Ихь халачйириъ табасаранарин девлетлу сяняаьтчивал фици атIабгнаш, гьаци дурарин гюрчег ва такабур эсерариъра ихь халкьдин тарихнан ва фольклорин ирс атIабгна. Маракьлу зегьметнан рякъ ккадапIу ва гъи баркаллагьниинди дуву давам апIурайи табасаран шаирарра зиихъ кудухнайи юбилярарин сиягьназ дахил шула.

Аьзиз дустар! Зиихъ кудухнайи шаирарин юбилеяр мектебариъ, культурайин хулариъ, библиотекйириъ ва бицIидарин багъариъ къаршуламиш апIинай кIури меркездиан дуфнайи кагъзариъ айи табшуругъар ва планар тамам апIруган, ихь шаирарра гьадрархуб кауб ккун апIури, учвухьна илтIикIураза.

КIваин апIуз ккундузуз: табасаран совет литературайин бина дивдарикан сар вуйи Абумуслим Жяфаровдин цци 115 йис, чпин яратмиш’валин рякъюъ табасаран халкьдин гъир’ят, намус ва эдеб атIабгнайи, гьяйифки, вахтсузди уьмриан гъушу Шамил Къазиевдин ва Пирмягьмад Аслановдин 80 йис, гъийин деврин литературайиъ баркаллувалиинди дурарин яратмиш’валин рякъюн ирс чан бикIбариъ давам апIурайи Эльмира Аьшурбеговайин 55 йис тамам шула.

Гьаддиз, дустар, идарйирин цаларик кирхрайи кьуларик, стендарик ва гьязур апIурайи цалин газатарик дураринра суратар улупай. Эгер ихь халкьдин вакилар ухьу кIваин дарапIиш, дурарикан дулухиш, жарари дурар гьичра кIваин апIидар.